Suriyadagi terrorchilik tashkiloti safiga qo‘shilib, jangovar harakatlarda qatnashib kelayotgan shaxs aniqlandi, deb xabar berdi O‘zbekiston Ichki ishlar vazirligi axborot xizmati.
Qayd etilishicha, 2001-yilda Toshkent shahrida tug‘ilgan M.T. Turkiyaga borib, u yerda “Katiba al-G‘uroba al-Turkiston” terrorchilik tashkiloti yollovchilarining ta’siriga tushgan. Aylanma yo‘llar orqali Suriyaga o‘tib, ushbu tashkilot safiga qo‘shilgan.
Uning hozirda jangovar harakatlarda qatnashib kelayotgani aniqlandi, deyiladi xabarda.
Holat yuzasidan Jinoyat kodeksining 244−2-moddasi (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atilib, tergov harakatlari olib borilmoqda.
Ushbu jinoyat uchun qonunchilikda 5 yildan 15 yilgacha ozodlikdan mahrum qilish jazosi ko‘zda tutilgan.
