Prezident Shavkat Mirziyoyev 20-iyul kuni “Toshkent-Sharqiy” aeroporti qurilishini borib ko‘rdi.
Davlat rahbarining matbuot xizmati ma’lumotlariga ko‘ra, aeroportning umumiy maydoni 693 gektarni tashkil etadi. Loyihaga ko‘ra, u 4 kilometr uchish-qo‘nish yo‘lagi, zamonaviy terminallar, angarlar va perronlarga ega bo‘ladi. Aeroport ICAO III-A sinfidagi zamonaviy radiotexnika va meteorologik uskunalar bilan jihozlangan bo‘lib, ular qiyin ob-havo sharoitida uchish va qo‘nishni ta’minlaydi.
Bugungi kunda bu yerda uchish-qo‘nish yo‘li va VIP-terminal binosi qurilgan. Prezident ularni ko‘zdan kechirib, qurilishning keyingi bosqichlarini moliyalashtirish, aeroportning tashqi ko‘rinishini va delegatsiyalarni qabul qilish shartlarini qayta ko‘rib chiqish bo‘yicha topshiriqlar berdi, deyiladi xabarda. Biroq unda aeroportni ishga tushirish vaqti haqida xabar berilmagan.
Uzbekistan Airways departamenti direktori Nodir Xo‘jamov “O‘zbekiston 24” telekanaliga bergan intervyusida prezident loyihani “juda jiddiy va tanqidiy” qayta ko‘rib chiqish topshirig‘ini berganini ma’lum qildi.
“Ushbu aeroportning asosiy maqsadi O‘zbekistonda biznes aviatsiyasini rivojlantirishdir. Biz 150 o‘rinli yana bir qo‘shimcha biznes terminalini qurish topshirig‘ini oldik”, — dedi u.
Eslatib o‘tamiz, loyiha prezidentning 2017-yil 30-iyundagi qaroriga binoan qariyb olti yil davomida bajarib kelinmoqda. Ilgari aerodromda joylashgan harbiy-transport aviatsiyasi boshqa hududga ko‘chirilgandi.
Loyihani amalga oshirgan “O‘zbekiston temir yo‘llari” kompaniyasi 2018-yil dekabr oyida uning birinchi bosqichi yakunlanishi 2020-yilga mo‘ljallanganini ma’lum qilgandi.
Loyihada havo porti ikkita terminalga ega bo‘lishi aytilgan. Birinchisi — davlat rahbarlari, amaldorlar va delegatsiyalar uchrashuvlari uchun. Ikkinchisi — biznes vakillari va boshqa yo‘lovchilarga xizmat ko‘rsatish uchun. Shuningdek, aeroportda yuk terminali bo‘lishi haqida xabar berilgan. Dastlab 4 km uzunlikdagi ikkita uchish-qo‘nish yo‘lagini qurish rejalashtirilgandi, ammo yangi loyihada faqat bitta chiziq mavjud.
