Президент Шавкат Мирзиёев 20 июль куни «Тошкент-Шарқий» аэропорти қурилишини бориб кўрди.
Давлат раҳбарининг матбуот хизмати маълумотларига кўра, аэропортнинг умумий майдони 693 гектарни ташкил этади. Лойиҳага кўра, у 4 километр учиш-қўниш йўлаги, замонавий терминаллар, ангарлар ва перронларга эга бўлади. Аэропорт ICAO III-А синфидаги замонавий радиотехника ва метеорологик ускуналар билан жиҳозланган бўлиб, улар қийин об-ҳаво шароитида учиш ва қўнишни таъминлайди.
Бугунги кунда бу ерда учиш-қўниш йўли ва VIP-терминал биноси қурилган. Президент уларни кўздан кечириб, қурилишнинг кейинги босқичларини молиялаштириш, аэропортнинг ташқи кўринишини ва делегацияларни қабул қилиш шартларини қайта кўриб чиқиш бўйича топшириқлар берди, дейилади хабарда. Бироқ унда аэропортни ишга тушириш вақти ҳақида хабар берилмаган.
Uzbekistan Airways департаменти директори Нодир Хўжамов «Ўзбекистон 24» телеканалига берган интервьюсида президент лойиҳани «жуда жиддий ва танқидий» қайта кўриб чиқиш топшириғини берганини маълум қилди.
«Ушбу аэропортнинг асосий мақсади Ўзбекистонда бизнес авиациясини ривожлантиришдир. Биз 150 ўринли яна бир қўшимча бизнес терминалини қуриш топшириғини олдик», — деди у.
Эслатиб ўтамиз, лойиҳа президентнинг 2017 йил 30 июндаги қарорига биноан қарийб олти йил давомида бажариб келинмоқда. Илгари аэродромда жойлашган ҳарбий-транспорт авиацияси бошқа ҳудудга кўчирилганди.
Лойиҳани амалга оширган «Ўзбекистон темир йўллари» компанияси 2018 йил декабрь ойида унинг биринчи босқичи якунланиши 2020 йилга мўлжалланганини маълум қилганди.
Лойиҳада ҳаво порти иккита терминалга эга бўлиши айтилган. Биринчиси — давлат раҳбарлари, амалдорлар ва делегациялар учрашувлари учун. Иккинчиси — бизнес вакиллари ва бошқа йўловчиларга хизмат кўрсатиш учун. Шунингдек, аэропортда юк терминали бўлиши ҳақида хабар берилган. Дастлаб 4 км узунликдаги иккита учиш-қўниш йўлагини қуриш режалаштирилганди, аммо янги лойиҳада фақат битта чизиқ мавжуд.
