Toshkentdagi Aziya Invest Favorit qurilish kompaniyasining “Izzat” turar-joy majmuasidan kvartira sotib olgan aholi muammosini hal qilish uchun O‘zbekiston bosh vaziri o‘rinbosari Ochilbay Ramatov boshchiligida hukumat komissiyasi tuzildi. Bu haqda “Gazeta.uz”ga bosh vazir matbuot kotibi Bekzod Hidoyatov ma’lum qildi.
Vazirlar Mahkamasida aldangan hissadorlar bilan uchrashuv.
Shuningdek, komissiya tarkibiga adliya vaziri Akbar Toshqulov, qurilish va uy-joy kommunal xizmat ko‘rsatish vaziri o‘rinbosari Davronjon Odilov, Markaziy bank raisining birinchi o‘rinbosari Nodirbek Saydullayev va boshqalar kiritildi.
“Gazeta.uz” bir guruh fuqarolarning poytaxtning Yashnobod tumani Izzat ko‘chasida 8 ta ko‘p qavatli uy qurayotgan kompaniya ustidan prezidentga murojaat qilgani haqida yozgandi. Quruvchi banklardan kredit olish uchun fuqarolarga sotib bo‘lingan kvartiralar kadastr hujjatlarini o‘z xodimlari nomiga rasmiylashtirib, ularni garovga qo‘ygan. Bunday sxema haqida 2021-yilning yozidayoq xabar berilgan, ammo kompaniya qurilayotgan uylardagi kvartiralarni sotishda davom etgan. 1000 dan ortiq aholiga yetkazilgan zarar 300 mlrd so‘mdan oshishi mumkin. Holat yuzasidan jinoiy ish qo‘zg‘atilgan.
Bosh vazir Abdulla Aripov komissiyaga loyiha-smeta hujjatlari, qurilish qoidalari va normalariga, qurilish jadvaliga rioya etilishini tekshirish, qurilish tashkilotining imkoniyatlarini o‘rganish, korxona va mulkdorlar o‘rtasidagi shartnomalarni tahlil qilish, tomonlarning majburiyatlari, sotib olish bo‘yicha to‘lovlarni o‘rganish, kadastr va ipoteka hujjatlarining bajarilishini tahlil qilish bo‘yicha topshiriqlar berdi.
Komissiya, shuningdek, pudratchining rejalashtirilgan va tugallanmagan uylarning qurilishini yakunlashi, uy-joylarni o‘rnatish va jihozlashni amalga oshirishi, shuningdek, foydalanishga topshirishi imkoniyatlarini ham o‘rganishi kerak.
Bundan tashqari, uy-joy qurish uchun jalb qilingan bank krediti bo‘yicha to‘lovlarni kechiktirish, shuningdek, garovga qo‘yilgan kvartiralarni bank balansidan chiqarish va kreditni kafolatlash uchun ularni quruvchining boshqa mulkiga almashtirish imkoniyatlarini o‘rganish rejalashtirilgan.
Shuningdek, kvartiralarni (kredit bo‘yicha garovga qo‘yilgan) xatlovdan olib tashlash va mulkdorlarga kadastr hujjatlarini berish rejalashtirilgan.
Komissiya “Suvsoz” korxonasiga qarashli 4,5 gektar maydonda asossiz qurilgan uy-joylarni sotish jarayonlarini o‘rganadi, davlatga yetkazilgan zararni dastlabki baholaydi, shundan so‘ng yer uchastkalarini olib qo‘yish yoki yer uchastkasi qiymatini uylar qiymatida aks ettirish variantlari ko‘rib chiqiladi.
20-iyulga qadar bosh vazir o‘rinbosari Ochilbay Ramatov o‘rganishni yakunlashi va muammoni hal etish bo‘yicha asosli takliflar kiritishi kerak.
Adliya vaziri va Bosh prokuratura bir oy muddatda shartnomalar doirasida yangi qurilishlardan kvartiralarni oluvchilarning huquqlarini mustahkamlashga qaratilgan huquqiy hujjatlar loyihalarini ishlab chiqishi hamda Vazirlar Mahkamasiga kiritishi lozim. Gap to‘lovlarni sug‘urtalash, mulkiy huquqlarni belgilash, talab va me’yorlarga rioya qilmagan yuridik va jismoniy shaxslarning javobgarligini oshirish, pul mablag‘larini qaytarish kafolatlarini kuchaytirish haqida bormoqda.
