O‘zgidromet xizmati agentligi ish haftasi davomida — 15−19-may kunlari kuzatiladigan ob-havo haqida ma’lumot berdi.

Sinoptiklarning prognozlariga ko‘ra, hafta davomida O‘zbekiston hududining katta qismi Kavkaz hududlari ustida shakllangan yuqori siklon ta’siri ostida bo‘ladi.

Dushanba kuni respublika bo‘yicha quruq va ochiq ob-havo saqlanib turadi, faqat Qoraqalpog‘iston Respublikasi va Xorazm viloyatida vaqti-vaqti bilan yomg‘ir yog‘adi, ba’zi joylarda kuchli bo‘ladi, momaqaldiroq ham bo‘lishi mumkin. Havo harorati kunduzi +33…+35 darajani tashkil etadi.

Ish haftasining qolgan kunlarida respublika bo‘yicha vaqti-vaqti bilan yomg‘ir yog‘adi, momaqaldiroq bo‘ladi. 16-mayda Qoraqalpog‘iston Respublikasi va Xorazm viloyatida, 17-mayda Buxoro, Navoiy, Toshkent, Samarqand, Jizzax, Qashqadaryo viloyatlarida yomg‘ir kuchli yog‘ishi mumkin, ayrim joylarda do‘l yog‘ishi mumkin.

O‘zgidromet xabariga ko‘ra, harorat foni quyidagicha bo‘ladi:

  • seshanba kuni kechasi +18…+20 darajani, kunduzi +31…+33 darajani tashkil etadi;
  • chorshanba kuni kechasi +13…+18 daraja bo‘ladi, kunduzi +17…+22 darajagacha pasayadi;
  • payshanba kuni kechasi +10…+15 daraja bo‘ladi, kunduzi +20…+25 darajagacha biroz ko‘tariladi;
  • juma kuni kechasi +12…+17 darajani tashkil etadi, kunduzi +25…+30 darajagacha yana biroz ko‘tariladi.

15−16-may kunlari shimolda va cho‘l hududlarda, 17-mayda respublika bo‘yicha ba’zi joylarda shamol tezligi 15−20 m/s gacha kuchayishi kutilmoqda. Ba’zida 23−25 m/s gacha kuchayishi, ayrim joylarda chang-to‘zonlar bilan kuzatilishi mumkin.

Respublikaning tog‘oldi va tog‘li hududlarida vaqti-vaqti bilan yomg‘ir yog‘adi, momaqaldiroq bo‘lishi mumkin. 17−19-may kunlari ba’zi joylarda kuchli bo‘ladi. Baland tog‘larda (2000 metrdan yuqorida) 17−19-may kunlari yomg‘ir qorga aylanishi mumkin.

Toshkent shahrida dushanba va seshanba kunlari yog‘ingarchilik kutilmaydi, chorshanba va payshanba kunlari vaqti-vaqti bilan yomg‘ir yog‘adi, momaqaldiroq bo‘ladi. Shamol chorshanba kuni 12−15 m/s gacha kuchayishi mumkin.

Harorat 15-may kuni kunduzi +33…+35 darajani, 16-may kuni kechasi +18…+20 darajani, kunduzi +29…+31 darajani tashkil etadi. 17-may kuni kechasi +16…+18 daraja bo‘ladi, kunduzi +20…+22 darajagacha pasayadi, 18-may kuni kechasi +12…+14 darajagacha pasayadi, kunduzi +23…+25 darajagacha biroz ko‘tariladi.