14-aprel kuni O‘zbekiston energetika vaziri Jo‘rabek Mirzamahmudov Moskvada Rossiya hukumati rahbari o‘rinbosari Aleksandr Novak bilan uchrashuv o‘tkazdi, deb xabar qildi Rossiya hukumati matbuot xizmati. O‘zbekiston delegatsiyasi tarkibida “O‘zbekneftgaz” rahbari Bahodirjon Sidiqov ham bor edi.
Tomonlar gaz, neft, elektroenergetika sohalari, jumladan, qayta tiklanadigan energiya manbalari va gidroelektrstansiya loyihalari, shuningdek, atom elektrstansiyalari qurilishi sohasidagi hamkorlik masalalarini muhokama qildi.
Uchrashuv davomida O‘zbekistonga neft va neft mahsulotlari yetkazib berishni ko‘paytirish imkoniyatlari, shuningdek, “Rosatom”ning yangi atom energetikasi obyektlarini qurishdagi ishtiroki istiqbollari ham muhokama qilindi.
Juma kuni Rossiya tashqi ishlar vaziri Sergey Lavrov O‘zbekistonga tashrifi chog‘ida O‘zbekiston, Qozog‘iston va Rossiya gaz ittifoqi loyihasini muhokama qilishda “jumladan, prezidentlar darajasida faol olg‘a siljishganini” aytgan.
