O‘zbekistonda zo‘ravonlikka qarshi qaratilgan loyiha — Nemolchi.uz 2019-yilda qo‘shnisi tomonidan zo‘rlanganini aytib bergan qizning hikoyasini e’lon qildi.
Qiz ota-onasi bilan AQShda yashagan. O‘sha yozda u Toshkent viloyati Qibray tumanida yashovchi buvisining oldiga kelgan.
Kechqurun u uyiga ketayotganida Sh. Sh. ismli erkak uni sudrab bino ichiga olib kirib zo‘rlagan. O‘sha paytda jabrlanuvchi 13 yoshda, erkak 27 yoshda bo‘lgan. Qiz tahdidlar tufayli voqea haqida kattalarga aytmagan.
Qo‘shma Shtatlarga qaytgach, qiz depressiyani boshdan kechira boshlagan, hatto unda o‘z joniga qasd qilish haqida fikrlar paydo bo‘lgan. Shundan so‘ng u psixologga borishni boshlagan va mashg‘ulotlardan birida u bilan nima bo‘lganini aytib bergan. qizning ota-onasi erkakni jinoiy javobgarlikka tortishga qaror qilib, 2022-yilning fevral oyida qizi bilan Toshkentga kelishgan. O‘shanda Sh. Sh. O‘zbekiston Milliy gvardiyasida ishlayotgan bo‘lgan (u 2020-yil fevral oyida ishga qabul qilingan).
Qizning otasi Sh. Sh.ning uyiga kelib, qizini zo‘rlanganidan xabari borligini aytgan. Uning so‘zlariga ko‘ra, “erkak dastavval o‘z aybiga iqror bo‘lgan, uni otasiga xabar bermaslikka ko‘ndirgan, yig‘lab, tiz cho‘kib kechirim so‘ragan va hatto o‘zini osib qo‘yish bilan tahdid qilgan. Biroq, ertasi kuni erkak ular tuhmat qilayotganini aytib, janjal qilgan, ular hech narsani isbotlasholmasligini aytib, o‘tgan uch yil va voqea moddiy manfaat uchun o‘ylab topilganini aytgan”.
Xabarda aytilishicha, erkak bir necha yil avval qizning otasi bilan hamkorlikda ishlagan va qizni otasi bilan birga ko‘p marta ko‘rgan. Keyinroq esa u jabrlanuvchini umuman tanimasligini aytgan.
2022-yil 2-mart kuni qiz Qibray tumani prokuroriga ariza yozgan. Ariza IIBga yuborilgan, biroq Sh. Sh. Milliy gvardiya xodimi bo‘lgani sababli tergovchi Raimqulov B.N. arizani prokuraturaga qaytarib yuborgan.
2022-yil may oyida advokatning murojaatidan so‘ng materiallar Chirchiq harbiy prokuraturasiga yuborilgani aniqlangan. Iyul oyida jabrlanuvchining oilasi materiallar Qibray tumani prokuraturasiga qaytarilgani va prokuratura ularni ichki ishlar bo‘limiga yuborgani va o‘sha tergovchi Raimqulov ishda jinoyat alomatlari yo‘qligi sababli ish qo‘zg‘atishdan bosh tortganidan xabar topgan. Raimqulov qizning ota-onasining noroziligiga javoban “prokuror o‘rinbosari A.Numonov jinoyat ishini tugatish to‘g‘risida buyruq berdi”, — degan.
Shundan so‘ng oila yana bir nechta urinishlar amalga oshirgan:
- 2022-yil 17-avgust kuni Ichki ishlar vazirligi Tergov bo‘limi boshlig‘iga, Respublika bosh prokuroriga, Oliy Majlis Qonunchilik palatasi deputatiga, Oliy Majlisning bola huquqlari bo‘yicha vakiliga;
- 2023-yil 9-yanvar kuni Oliy Majlis Qonunchilik palatasi deputati Mavluda Alhamjonovaga.
- 2023-yil 7-fevral kuni O‘zbekiston bosh prokuroriga, Bosh prokuratura huzuridagi Voyaga yetmaganlar ishlari bo‘yicha departamentga ariza yuborilgan.
Milliy gvardiya matbuot xizmatining xabar berishicha, jabrlanuvchining Toshkent viloyati Qo‘riqlash boshqarmasida xizmat qilayotgan oddiy askar Sh. Sh.ga nisbatan arizasi Bosh prokuraturaga ko‘rib chiqish uchun taqdim etilgan.
Mazkur holat yuzasidan 4-aprel kuni Toshkent viloyati prokuraturasi tomonidan Jinoyat kodeksining 118-moddasi 4-qismi (14 yoshga to‘lmagani ma’lum bo‘lgan shaxsni zo‘rlash) bilan jinoyat ishi qo‘zg‘atilgan, deb xabar berdi Bosh prokuratura matbuot xizmati.
“Sh.Sh.ning Qo‘riqlash boshqarmasida keyingi xizmati to‘g‘risida qaror tergov natijalariga ko‘ra qabul qilinadi”, — deyiladi Milliy gvardiya xabarida.
