Finance TCI «Kapitalbank»ning asosiy aksiyadoriga aylandi, deya yozmoqda Spot Yagona korporativ axborot portali ma’lumotlariga tayanib.
Finance TCI 2022 yil 28 dekabrdagi birja savdolarida bankning 214,4 mln dona aksiyalarini (ustav kapitalining 50 foizi) sotib oldi. Bitim 786,89 mlrd so‘mni tashkil etdi, aksiya narxi 3670 so‘mga teng.
Xarid qilish vaqtida Finance TCI «Kapitalbank»ning 49,4 mln dona qimmatli qog‘ozlariga ega edi. Ularni inobatga olgan holda kompaniya hozirda 61,54 foiz aksiyalarga egalik qilmoqda.
Finance TCI Alisher Usmonovning USM xolding tuzilmalariga tegishli bo‘lgan 2022 yil yanvarida bank 8,33 foiz ulushiga ega edi. USM`ning sho‘ba korxonasi «Telekominvest» 2021 yilning kuzida bank aksiyadoriga aylandi, keyin esa o‘z ulushini kengaytirdi.
Yanvar oyi oxiriga kelib Alisher Usmonovga aloqador kompaniyalar «Kapitalbank»ning 58,33 foizini nazorat qila boshladi. 2021 yil noyabr oyida aksiyalarning yarmiga egalik qilgan avvalgi bosh aksiyador Oybek Tursunov afillangan shaxslar ro‘yxatidan chiqarildi.
Biroq Ukrainada urush boshlanganidan keyin Alisher Usmonov Yevropa Ittifoqi, AQSh va Buyuk Britaniya sanksiyalari ostida qoldi. Shundan so‘ng, USM xoldingi «Telekominvest» va Finance TCI «Kapitalbank» biznesini rivojlantirishdan manfaatdor bo‘lgan xususiy investorlar guruhiga sotilishini e’lon qildi.
Spot hozirda USREO`da Finance TCI`ning yagona asoschisi sifatida Djuzum SPV qayd etilgani haqida yozmoqda. Shuningdek, Uzum, Uzum Market, Uzum Technologies va One Factor va Fast Delivery Technologies kabi IT-kompaniyalari egasi sifatida qayd etilgan.
