Meksikada o‘tkazilayotgan taekvondo bo‘yicha Jahon chempionatining +73 kg vazn toifasida bahs olib borgan Svetlana Osipova jahon chempioni bo‘ldi, deya xabar bermoqda Sporti rivojlantirish vazirligi matbuot xizmati.
Final bellashuvida Svetlana Osipova isroillik Dana Arzanni 3 raundda (2:1) mag‘lubiyatga uchratdi. Bu bilan Osipova jahon chempionatlarida g‘alaba qozongan birinchi o‘zbekistonlik taekvondochi qiz bo‘ldi.
Shuningdek, O‘zbekiston terma jamoasi vakillari Nikita Rafalovich (-87 kg) va Feruza Sodiqova (-62 kg) bronza medallarini qo‘lga kiritdi.
Eslatib o‘tamiz, avgust oyida Vetnamda o‘tkazilgan taekvondo WT bo‘yicha kadetlar va yoshlar o‘rtasidagi Osiyo chempionatida O‘zbekiston terma jamoasi 6 ta medalga sazovor bo‘lgandi. Shuningdek, Bolgariyaning Sofiya shahrida o‘tkazilayotgan taekvondo WT bo‘yicha o‘smirlar o‘rtasidagi jahon chempionatida o‘zbekistonlik taekvondochilar ikkita kumush va bitta bronza medalini qo‘lga kiritgandi.
