15 avgust kuni kechqurun Surxondaryo viloyatining Sherobod tumanida Afg‘oniston farqlash belgilari bo‘lgan samolyot qulab tushdi. Ijtimoiy tarmoqlarda qulagan samolyot qismlari va kamida bir inson jarohatlanganligi aks etgan video va fotolar tarqaldi.
«Gazeta.uz» holat bo‘yicha O‘zbekiston Tashqi ishlar vazirligidan izoh ololmadi. Mudofaa vazirligi holatni o‘rganayotganligini ma’lum qildi.
Foto: Topnewsuz / Telegram
«Gazeta.uz»ning Surxondaryodagi manbasi ikki nafar afg‘onistonlik harbiy xizmatchi Respublika shoshilinch tibbiy yordam ilmiy markazi Termiz filialiga yotqizilganligini tasdiqladi.
Bu voqeadan bir kun oldin uch afg‘on askari kasalxonaga yotqizilgan. Katta ehtimol bilan, gap O‘zbekiston Tashqi ishlar vazirligi o‘z bayonotida xabar bergan uch yarador afg‘on askari haqida ketmoqda.
Besh nafar afg‘onistonlikning ahvoli o‘rtacha deb baholanmoqda. Yaradorlar «ko‘krak qafasining penetral jarohati, miya chayqalishi va boshqalar» tashxisi bilan tibbiy muassasaga yotqizilgan, deya ta’kidladi manba.
Tasdiqlanmagan ma’lumotlarga ko‘ra, samolyotda bo‘lganlar parashyut bilan sakrashga muvaffaq bo‘lgan.
Shuningdek, yana bir o‘zbekistonlik harbiy xizmatchining kasalxonaga yotqizilganligi haqida xabar berilmoqda. Uning ahvoli og‘ir deb baholanmoqda. Bu afg‘on samolyot bilan qulashi bog‘liqmi yoki yo‘qmi, ma’lum emas.
Eslatib o‘tamiz, 14 avgust kuni O‘zbekiston davlat chegarasini kesib o‘tgan 84 nafar Afg‘oniston harbiy xizmatchisiga tibbiy yordam va vaqtinchalik boshpana taqdim etdi. TIV afg‘on fuqarolarini vataniga qaytarish hamda Termiz-Hayraton ko‘prigi hududidagi vaziyatni yumshatish uchun afg‘on tomoni bilan muzokaralar olib bormoqda.
