Shavkat Mirziyoyev «Yoshlarni har tomonlama qo‘llab-quvvatlash va ularning ijtimoiy faolligini yanada oshirishga oid qo‘shimcha chora-tadbirlar to‘g‘risida"gi farmonni imzoladi. Bu haqda «Nigoh» Telegram-kanali xabar bermoqda.
Qayd etilishicha, hujjat bilan:
- avgust oyida «Temir daftar»ga kiritilgan oilalarning 18 yoshgacha bo‘lgan har bir farzandlari (o‘quv qurollari, kitob, kiyim-kechak) uchun 500 ming so‘mdan bir martalik moddiy yordam ko‘rsatiladi. Ushbu maqsadlar uchun 128 ming bolaga davlat byudjetidan mablag‘ ajratiladi;
- «Temir daftar»ga kiritilgan oilalarning oliy ta’lim muassasalarida ta’lim olayotgan farzandlarining 2021−2022 o‘quv yilida to‘lov-kontrakt summasi birinchi o‘quv yili uchun davlat byudjeti mablag‘lari hisobidan qoplab beriladi.
Shuningdek, «Temir daftar», «Ayollar daftari»ga kiritilgan oilalar farzandlari va «Yoshlar daftari»ga kiritilgan yoshlarga yangi turmush qurayotganida o‘z xonadonida qo‘shimcha uy-joy qurishi uchun 33 mln so‘mgacha garovsiz kredit ajratiladi. 2 mingta yosh oilalarni uy-joy sotib olish uchun boshlang‘ich badal va foiz to‘lovlarini qoplashga Davlat byudjetidan subsidiya ajratiladi.
Farmonga ko‘ra, 1 sentyabrdan talabalar uchun Markaziy bankning asosiy foiz stavkasi (14 foiz) miqdorida imtiyozli ta’lim kreditlarini berish joriy etiladi.
Nufuzli xalqaro reyting agentliklarining yetakchi 500 talik ro‘yxatiga kirgan xorijiy oliy ta’lim tashkilotlarini tamomlagan yoki ularda ilmiy daraja olgan yosh mutaxassislarning lavozim maoshiga qo‘shimchalar to‘lash tizimi joriy etiladi.
Qayd etilishicha, sentyabr oyidan boshlab, Toshkent shahrida ilg‘or xorijiy tajriba asosida Yoshlar biznes maktabi faoliyati yo‘lga qo‘yilib, unda shu yilda 1,4 ming nafar yoshlarga tadbirkorlik va biznes yuritishda yaxshi natijalarga erishish va xavf-xatarlardan himoyalanish usullari o‘rgatiladi. 2022 yilda Yoshlar biznes maktabining respublika miqiyosida filiallari tashkil etiladi.
1 sentyabrdan yoshlarning «Biznesga birinchi qadam» startap loyihalari tanlovi doirasida har bir tuman va shaharda 3 nafardan g‘oliblarga grantlar berish amaliyoti joriy etiladi. Loyihalarni har biri uchun 50 mln so‘mlik grantlar beriladi.
Ma’lumot uchun, hukumatning 11 martdagi qaroriga muvofiq «Yoshlar daftari»ga kiritilganlarga 980 ming so‘mgacha bir martalik yordam ko‘rsatilishi hamda «Temir daftar»ga kiritilgan oilalar farzandlarining to‘lov-kontrakt summasi 50 foizigacha to‘lab berilishi haqida xabar berilgan edi.
Prezidentning 20 apreldagi farmoniga ko‘ra, 1 maydan «yoshlar daftari»ga kiritilganlarga tadbirkorlik faoliyatini boshlashlari uchun subsidiyalar berilishi haqida xabar berilgan.
