Chexiya Rossiya elchixonasining 18 nafar xodimini mamlakatdan chiqarib yuboradi
Chexiya Rossiya elchixonasining 18 nafar xodimini mamlakatdan chiqarib yubormoqda, ular, mahalliy maxsus xizmatlarning ma’lumotlariga ko‘ra, Rossiya razvedkasi zobitlaridir. Bu haqda 17 aprel kuni Pragada bo‘lib o‘tgan favqulodda matbuot anjumanida bosh vazirning birinchi o‘rinbosari va ayni paytda tashqi ishlar vaziri vazifasini bajaruvchi ichki ishlar vaziri Yan Gamachek ma’lum qildi. “Chexiya tashqi ishlar vaziri sifatida men Rossiyaning Pragadagi elchixonasi xodimlarini chiqarib yuborishga qaror qildim, ular bizning maxsus xizmatlarimiz tomonidan SVR va GRU rus maxsus xizmatlarining zobitlari sifatida aniq belgilandi. 48 soat ichida Rossiya elchixonasining 18 xodimi Chexiyani tark etishi kerak”, — dedi u. Matbuot anjumanida Chexiya bosh vaziri Andrey Babish ham ishtirok etdi. Uning so‘zlariga ko‘ra, GRU 2014 yilda mamlakat sharqidagi Zlin shahri yaqinidagi Vrbetits qishlog‘idagi o‘q-dorilar omboridagi portlashda ishtirok etgan.
Slovakiya prezidenti Zuzana Chaputova 18 aprel kuni Chexiya Respublikasining ushbu harakatlarini qo‘llab-quvvatlashini bildirdi. “Slovakiya chet el maxsus xizmatlarining taxmin qilingan [Chexiyaga qarshi] buzg‘unchilik faoliyatini diqqat bilan kuzatmoqda. Biz Chexiya Respublikasini va uning qadamlarini qo‘llab-quvvatlaymiz”, dedi Chaputova.
Shuningdek, Litva ham Chexiyaning xatti-harakatlarini qo‘llab-quvvatlashini bildirdi. Bu haqda mamlakat tashqi ishlar vaziri Gabrielyus Landsbergis 18 aprel kuni Twitter’da yozdi. “Biz ittifoqdoshimiz Chexiya bilan mamlakatdan [Rossiya elchixonasining xodimlarini] chiqarib yuborish to‘g‘risidagi qaror bilan to‘la birdamligimizni bildiramiz”, deyiladi xabarda.
Polsha Tashqi ishlar vazirligi ham Chexiya Respublikasining xatti-harakatlarini qo‘llab-quvvatlashini bildirdi. Bu haqda Tashqi ishlar vazirligi 18 aprel kuni Twitter’da ma’lum qildi. “Ittifoqdoshlarning birdamligi va tezkor harakatlar bizni kuchli qiladi. Polsha Chexiya Respublikasining 2014 yilda o‘q-dorilar omboridagi portlashda aybdor bo‘lgan rossiyalik diplomatlarni chiqarib yuborish to‘g‘risidagi qarorini to‘liq qo‘llab-quvvatlaydi”, deyiladi xabarda.
Bunga javoban 18 aprel kuni Rossiya TIV tomonidan Chexiya elchixonasining yigirma xodimi “persona non grata” deb e’lon qilindi. Ularga mamlakat hududini 2021 yil 19 aprel kuni kun oxirigacha tark etish buyurilgan.
Moldova Sotsialistik partiyasi mamlakat prezidentini fitnada ayblab, uning iste’fosini talab qilmoqda
Moldovadagi eng yirik sotsialistlar partiyasi prezident Mayya Sanduni konstitutsiyaga qarshi fitnada ayblab, uning iste’fosini talab qilmoqda. Bu haqda partiya rahbari, sobiq davlat rahbari Igor Dodon 18 aprel kuni bo‘lib o‘tgan partiyaning respublika kengashi yig‘ilishidan keyin aytib o‘tdi. “Sotsialistik partiya Mayya Sandu shaxsan bizning mamlakatimiz va uning xalqiga qarshi milliy va konstitutsiyaga qarshi fitnada qatnashgan deb hisoblaydi. Biz Mayya Sanduning iste’fosini va Moldova Respublikasida muddatidan oldin prezident saylovlarini o‘tkazilishini talab qilamiz”, deb yozgan Dodon Facebook’da. Uning ta’kidlashicha, partiya davlat rahbarining ochiq bosimi ostida qabul qilingan Konstitutsiyaviy sud qarorini “Moldovada xorijiy kuratorlar manfaatlari yo‘lida tashqi boshqaruv rejimini o‘rnatish maqsadida” konstitutsiyaviy to‘ntarish sifatida ko‘rmoqda. Sotsialistlar Konstitutsiyaviy sudning hozirgi tarkibiga ishonchsizlik bildirishib, uning uch a’zosining iste’fosini talab qilishmoqda, dedi Dodon. — Igor Dodonning Facebook’dagi sahifasi.
15 aprel kuni Moldova Konstitutsiyaviy sudi Mayya Sanduga parlamentni tarqatib yuborishga ruxsat bergan edi. Bunga parlamentning ikki marta hukumatni tasdiqlamagani sabab bo‘ldi.
Fratsiya prezidenti mamlakat qamoqxonalarida 8 ming qo‘shimcha joy yaratishga va’da berdi
Fransiya prezidenti Emmanuel Makron prezidentlik vakolati tugaguniga qadar mamlakat qamoqxonalarida yana 8 mingta qo‘shimcha joy yaratishni rejalashtirayotgani haqida ma’lum qildi. “Biz 7 mingta qo‘shimcha joy yaratdik va men 15 mingta [besh yillik vakolatim davomida] joy yaratishga va’da beraman. Keyinchalik biz yana 8 mingta joy yaratamiz — bu hafta hukumat harakatlar rejasini taqdim etadi va ular qayerda yaratilishi mumkinligini aniqlaydi”, — dedi Makron. Davlat rahbari, shuningdek, huquqni muhofaza qilish idoralarida qo‘shimcha 10 mingta ish o‘rni yaratish bo‘yicha avvalgi va’dasini bajarishini ta’kidladi. Uning ta’kidlashicha, ular 6,2 ming nafar politsiya xodimi va jandarmalarni jalb qilishgan bo‘lib, bu yildan boshlab 2 mingta yangi ish o‘rinlari paydo bo‘ladi. Makron, shuningdek, 30 ming xodimdan iborat politsiya zaxirasi yaratilishini, jandarma zaxirasi 30 kishidan 50 ming kishigacha ko‘paytirilishini aytdi. Unga ko‘ra, vakolat muddati tugaguniga qadar politsiya jihozlarining 50 foizini yangilash ishlari yakunlanadi, politsiya maxsus kiyimi ham o‘zgartiriladi. “Bu shuni anglatadiki, fransuzlar 2022 yilda ko‘chalarda forma kiygan odamlarni 2017 yilga qaraganda ko‘proq uchratishadi. Bu odamlarni tinchlantiradi va jinoyatchilarni qo‘rqitadi”, — deydi u. — Le Figaro.
Raul Kastro Kuba Kommunistik partiyasi rahbari lavozimidan iste’foga chiqdi
Kuba Kommunistik partiyasining birinchi kotibi Raul Kastro 18 aprel kuni Gavanada bo‘lib o‘tgan partiyaning 8-qurultoyida iste’foga chiqishini e’lon qildi. 89 yoshli Kastro rahbarlikni “ehtirosga to‘la va antiimperialistik ruhga ega” yosh avlodga topshirayotganini aytmoqda. Raul Kastro uni muhim lavozimlarga tayinlagan Kubaning sobiq rahbari Fidel Kastroning ukasi va sherigi bo‘lgan. 2008 yilda Raul Kastro bir vaqtning o‘zida Kuba davlati va hukumati rahbari, shuningdek, qurolli kuchlarining bosh qo‘mondoni bo‘lgan. 2018 yilda Kubaning yangi Konstitutsiyasi qabul qilinishi munosabati bilan Kastro Kuba Kommunistik partiyasi rahbari va bosh qo‘mondoni lavozimida qolgan holda davlat va hukumat rahbari lavozimlarini tark etdi. Konstitutsiyaning yangi tahririga binoan prezident va bosh vazir lavozimlari 2019 yilda Kubada qayta tiklandi. Shunday qilib, 60 yil ichida ilk bor Kastro oilasining vakillari unda rahbarlik lavozimlarini egallamaydilar. — Gazeta.uz
SpaceX Oyga astronavtlarni yetkazib berish bo‘yicha shartnomani qo‘lga kiritdi
Ilon Maskning SpaceX kompaniyasi kosmonavtlarni Oy yuziga yetkazib berish bo‘yicha NASA shartnomasini qo‘lga kiritdi. Jeff Bezosning Lockheed Martin, Northrop Grumman va Draper bilan birlashgan Blue Origin, hamda Dynetics kompaniyalari tanlovning so‘nggi bosqichida ham ishtirok etgan. Shartnomaning umumiy belgilangan qiymati 2,89 mlrd dollarni tashkil etadi. NASA rejalariga ko‘ra, to‘rt astronavt Oy orbitasiga ko‘p kunlik sayohatga “Orion” kosmik kemasi va Space Launch System raketasida yuboriladi. U yerdan ekipajning ikki a’zosi SpaceX’ning qo‘nish joyida Oy yuziga tushadi. Taxminan bir hafta ichida kosmonavtlar orbitaga qaytib, keyin Yerga yuboriladi. Ma’lum qilinishicha, astronavtlardan kamida biri ayol kishi bo‘ladi. AQSHning avvalgi ma’muriyati NASAga odamni 2024 yilda Oyga qaytarishni maqsad qilib qo‘ygan edi. Oy dasturi “Artemis” deb nomlangan va uni amaldagi prezident Jo Bayden ma’muriyati qo‘llab-quvvatlagan. — Gazeta.uz
Buyuk Britaniya hukumati “dushman davlatlardan” himoya qilish to‘g‘risidagi qonunni qabul qiladi
Xorijiy hukumatlar nomidan Buyuk Britaniyada ishlaydigan shaxslar yangi qonunga binoan qirollikda ekanligini tasdiqlash maqsadida ro‘yxatdan o‘tishlari shart bo‘ladi, bu millatni Xitoy va Rossiya kabi “dushman davlatlari"dan himoya qilish uchun qilinmoqda. The Times’ning yozishicha, bosh vazir Boris Jonson qirolichaning 11 maydagi nutqidan dushman davlatlarga qarshi kurashish to‘g‘risidagi qonun loyihasini e’lon qilish uchun foydalanadi. Qo‘yilgan talabni bajarmaslik uchun jinoiy javobgarlikka tortish ko‘zda tutilgan. Shuningdek, nashrda yozilishicha, hukumat davlat sirlari to‘g‘risidagi qonunni chet eldan Buyuk Britaniyaning manfaatlarini buzishga urinayotgan shaxslarga, shu jumladan dushman davlatlar nomidan ishlaydigan kiber xakerlarga qarshi ishlatilishi uchun yangilaydi. Ta’kidlanishicha, Jonson ushbu choralarni Rossiya va Xitoy faoliyatiga nisbatan xavotirlarning kuchayishi fonida davom ettirishga qaror qilgan. — The Times.
Ar-Riyod va Tehron munosabatlarni tiklash uchun muzokara o‘tkazmoqda
Saudiya Arabistoni va Eron rasmiylari munosabatlarni tiklash uchun to‘g‘ridan-to‘g‘ri muzokaralar o‘tkazmoqda, deb yozmoqda Financial Times o‘z manbalariga tayanib. Nashrning uchta manbasiga ko‘ra, muzokaralarning birinchi bosqichi 9 aprel kuni Bag‘dodda bo‘lib o‘tgan. Ushbu tashabbus 2016 yildan beri davlatlar o‘rtasidagi birinchi muhim siyosiy munozara deb hisoblanadi, deya ta’kidlaydi nashr. Keyingi haftada muzokaralarning yana bir raundi rejalashtirilgan, deya qo‘shimcha qilindi. Financial Times’ning yozishicha, muzokaralar jarayoniga, xususan, mart oyida Saudiya Arabistoni valiahd shahzodasi Muhammad bin Salmon Al Saud bilan suhbat o‘tkazgan Iroq bosh vaziri Mustafo al-Kazimiy yordam bermoqda. Saudiya Arabistonining yuqori lavozimli rasmiysi muzokaralarni rad etdi, deb yozadi nashr. Iroq va Eron hukumatlari ushbu ma’lumotlarga izoh berishdan bosh tortdilar. Boshqa ma’lumotlarga ko‘ra, Bag‘dod, shuningdek, Eron va Misr, Eron va Iordaniya o‘rtasidagi aloqalarni tiklashda vositachi rolini o‘ynagan. Nashrning manbasiga ko‘ra, Iroq bosh vaziri mamlakatni mintaqadagi ushbu antagonistik kuchlar o‘rtasidagi ko‘prikka aylantirishda shaxsan o‘zi turishini istamoqda. — Financial Times.
