Хитойнинг CITIC Construction компанияси Тошкент-Чиноз автомобиль йўлини реконструкция қилишда иштирок этиши мумкин. Бу ҳақда Ўзбекистон транспорт вазири Илҳом Маҳкамов билан компания раҳбарияти ўртасидаги учрашувда маълум бўлди.
Томонлар йўл қурилиши ва реконструкция қилиш соҳасидаги лойиҳаларни муҳокама қилди.
CITIC Construction компанияси Пунган-Наманган (президент ушбу лойиҳани тасдиқлаб бўлган) ва Тошкент-Чиноз йўлларини реконструкция қилишда, шунингдек, замонавий ечимлардан фойдаланган ҳолда янги пулли йўллар қуришда иштирок этиш истагини билдирган.
Транспорт вазирлиги раҳбари, ўз навбатида, мазкур йўлларни қисқа муддатда халқаро стандартларга жавоб берадиган замонавий технологиялардан фойдаланган ҳолда қуриш, шу билан бирга, қурилиш харажатларини камайтиришга алоҳида эътибор қаратиш зарурлигини таъкидлади.
Компания лойиҳаларни ўрганаётганини ва яқин кунларда лойиҳа таклифларини тақдим этишини билдирди.
Президент 2022 йил январь ойи бошида Тошкент-Чиноз автомобиль йўлининг 10 км узунликдаги қисмини таъмирлаш лойиҳасини тасдиқлаганди. Унинг боʻйлаб бешта ер ости оʻтиш ёʻли ва кириш ёʻллари қуриш режалаштирилган эди.
