Шавкат Мирзиёев Поп туманидаги Пунган қишлоғи ва Наманган шаҳри ўртасидаги автомобиль йўлини реконструкция қилиш лойиҳасини тасдиқлади. Бу ҳақда у 25 март куни Наманган вилоятига ташрифи чоғида маълум қилди.
«Бугун мана рухсат бердимки, Пунгандан Намангангача йўл қурилишини бошлаймиз. Йиллар давомида Наманган халқи, умуман, водий халқи, айниқса, қиш пайтлари жуда қийналяпти. „Перевал“ бўлганидан кейин, бу йўлни ҳам давом эттиришимиз керак эди, лекин „тегирмон навбати билан“ деганларидек, навбати етиб келди. Янги Ўзбекистонимизга мана шу янги йўлни, албатта, қурамиз», — деди президент.
Унинг сўзларига кўра, давлат раҳбари «орқасида давлат турибди, президент турибди, кафолат турибди, айтган гаплари, албатта, бажарилади» деган ишонч ҳосил қилишлари учун инвесторлар билан Намангандаги лойиҳаларни шахсан ўзи муҳокама қилади.
Тақдимотда таъкидланишича, йўлни реконструкция қилиш ишлари жорий йилнинг 25 апрелида бошланиб, 2025 йилнинг тўртинчи чорагида якунланиши режалаштирилган. Магистрал йўлдаги тезлик 120 км/соатни ташкил қилади. Йўл бўйлаб кўприклар ва йўл ўтказгичлар, шунингдек, ерости ўтиш жойлари қурилади. Транспорт вазирлиги матбуот хизматининг «Газета.uz»га ойдинлик киритишича, гап йўлни реконструкция қилиш ва кенгайтириш ҳақида кетмоқда.
Лойиҳа 1960 йилда ташкил этилган ва Хитой давлат конгломерати бўлган CITIC Group`нинг қурилиш ва муҳандислик шуъба корхонаси CITIC Construction томонидан амалга оширилади. Компания, шунингдек, энергетика, кимё саноати, қишлоқ хўжалиги ва атроф-муҳитни муҳофаза қилиш соҳаларида бизнесни ривожлантиради.
Мавзу контексти
2019 йил октябрь ойида Наманган вилояти собиқ ҳокими Хайрулла Бозоров (ҳозирда Фарғона вилояти раҳбари) ҳукумат ва Сенатдан транспорт оқими ва ЙТҲлар кўпайгани сабабли узунлиги 75 километр, икки йўлакли Пунган-Наманган йўлини кенгайтиришни сўраган эди.
2013 йилда Осиё тараққиёт банки (ОТБ) Ўзбекистонга 4P112 «Фарғона ҳалқа» автомобиль йўлининг Пунган-Наманган йўналишидаги 0−75 км қисмларини реконструкция қилиш учун 220 миллион доллар миқдорида кредит ажратганди.
Лойиҳа икки қаторли асфальт қопламасини тўрт қаторли цемент-бетон қопламага алмаштиришни назарда тутган.
«Бундан уч йил аввал йўлнинг кенгайтирилиши муносабати билан уй-жойлар ва деҳқон хўжаликлари мулкларини бузиш учун 11 миллиард сўм маблағ ажратилган эди. Кимгадир етказилган зарар миқдори аллақачон тўланган, 220 хонадон бошқа жойга кўчирилган, боғлар ва ўсимликлар вайрон қилинган. Биз ҳамма нарсани тайёр ҳолатга келтирдик. Аммо лойиҳа тўхтатилди. Ўшанда ЛБМИ (президент ҳузуридаги Лойиҳа бошқаруви миллий агентлиги, ҳозирда Истиқболли лойиҳалар миллий агентлиги — таҳр.) пайдо бўлиб, лойиҳанинг мақсадга мувофиқ эмаслиги ҳақида асоссиз хулоса чиқарган», — деганди Бозоров.
Транспорт вазирлиги ҳузуридаги Автомобиль йўллари давлат қўмитасининг собиқ раиси Абдураҳмон Абдувалиев бунга жавобан лойиҳа 2016 йилда тўхтатилгани, аммо йўл қопламасини таъмирлаш учун 100 минг тонна асфальт ётқизилганини маълум қилган.
Унинг сўзларига кўра, такрорий музокаралар чоғида ОТБ вакиллари ушбу ҳудудда йўлни кенгайтиришга талаб йўқ эканини таъкидлаган.
«Йўл ҳаракатини тартибга келтиринг — бахтсиз ҳодисалар бўлмайди», — деганди Абдураҳмон Абдувалиев ОТБнинг транспорт бўйича бош мутахассиси Паван Каркидан иқтибос келтириб.
