Президент раислигида 18 январь куни бўлиб ўтган йиғилишда экспортчиларни қўллаб-қувватлашга ажратилаётган маблағлар самарали ишлатилмаётгани таъкидланди, дея хабар бермоқда президент матбуот котиби Шерзод Асадов.
Қайд этилишича, экспортни кредитлашга 200 млн доллар ресурс берилган. Бундан ташқари, 2024 йилда экспортчиларни қўллаб-қувватлашга 800 млрд сўм йўналтирилмоқда. Президент, шунга қарамай, Экспорт агентлиги тармоқ ва ҳудуд раҳбарлари билан биргаликда бу маблағлардан самарали фойдаланишини таъминлай олмаётганини таъкидлади.
Масалан, экспорт олди молиялаштириш учун имтиёзли шартларда ажратилган ҳар 1 долларга ўртача 5 долларлик экспорт тўғри келяпти. Лекин, электротехникада бу кўрсаткич 2,5 доллар, қишлоқ хўжалигида ва фармацевтикада 3 долларни ташкил қилади. Айрим корхоналарнинг экспорт ҳажми олинган кредитдан кам бўлган бўлса, баъзилари кредит олиб, умуман экспорт қилмаган.
Шунингдек, 2023 йили халқаро стандарт жорий қилиш ва сертификат олиш учун 4,5 млрд сўм маблағ берилган 31 та корхона экспорт билан шуғулланмаган. Давлат раҳбари Экспорт агентлиги экспортчиларга ҳақиқий кўмакчи бўлиш ўрнига давлатдан берилган тайёр пулни йўналтирадиган «бухгалтер-кассир»га айланиб қолганини танқид қилди.
Шунингдек, эндиликда экспортни қўллаб-қувватлаш тизими ўзгариши белгиланди. Жаҳон савдо ташкилоти талаблари асосида Экспорт агентлиги Савдони ривожлантириш компанияси сифатида қайта ташкил этилади. Янги тизимга мувофиқ, Инвестиция вазирлиги чет элдаги қайси бозорда қандай маҳсулотлар харидоргир эканини аниқлайди. Уларга кириш учун ҳукуматлараро келишувларга эришади.
Савдо-саноат палатаси эса тадбиркорларга янги бозорлар талабларига мослашишга кўмаклашади. Савдони ривожлантириш компанияси берадиган субсидия, кредит ва ёрдамлар янги тадбиркорлик рейтинги асосида, энг аввало, юқори қўшилган қийматли маҳсулот билан янги бозорларга чиқаётган экспортчиларга ажратилади. Президент 1 мартдан ушбу тизимни жорий қилиш топшириғини берди.
