Энергетика вазири Жўрабек Мирзамаҳмудов «Дарё»га берган интервьюсида Ўзбекистонда атом электр станциясини қуриш бўйича режалаштирилган лойиҳанинг ҳолатига изоҳ берди.
Унинг сўзларига кўра, Россиянинг «Росатом» агентлиги билан учрашув ва музокаралар давом этмоқда.
«Бизда МАГАТЭнинг талабларига асосан процедуралар амалга ошириляпти. Яъни майдонни лицензиялаш, меъёрий ҳужжатларни ишлаб чиқиш жараёнлари кетмоқда. Сўнгги пайтларда кичик модулли реакторлар бўйича технологиялар ривожланяпти. Келишувга асосан шуни ҳам параллель равишда таҳлил қиляпмиз. Катта станция қуриш керакми ёки кичик қувватли станциялар қуриш бўйича ҳозир таҳлиллар олиб бориляпти. Нафақат Россия, бошқа хорижий давлатлар тажрибаси, технологияси ўрганиляпти. Шунинг учун бу борада ишни тўхтатганимиз йўқ», — деди вазир.
«Жуда катта стратегик лойиҳа бўлгани учун шошилмасдан, барча нарсани ўлчаб, етти марта эмас, етмиш етти марта ўлчаб, ҳамма нарсасининг ҳисоб-китобини, таҳлилини қилган ҳолда президентимизга ҳисобот кирита оламиз», — деди Мирзамаҳмудов.
«Дарё» интервьюси 23 ноябрь куни эълон қилинди. Шу билан бирга, Россиянинг «Росатом» давлат корпорацияси бош директори Алексей Лихачев 27−28-ноябрь кунлари бўлиб ўтган «Примаковские чтения» форумида сўзлаган нутқида Ўзбекистонда атом электр станциясини қуриш бўйича келишув ишлари якуний босқичда эканини таъкидлаганди.
«Бизнинг тушунишимиз бўйича, биз 2019-йилда барча асосий қарорларга эришдик. <...> Пандемия кўплаб жараёнларни тўхтатди, бироқ мен ўзбек лойиҳасини тўхтатилган лойиҳа деб атай олмайман. <...> Атом электр станцияси қурилиши юзасидан шартнома бўйича ишлар якуний босқичда», — деди «Росатом» раҳбари ва лойиҳани ишлаб чиқиш давом этаётганини қўшимча қилди.
«Биз, жумладан, кам қувват, кадрлар тайёрлаш бўйича қўшимча таклифлар бердик. Шартнома устида ишлаш етарлича интенсив давом этмоқда ва менимча, умуман олганда, биз шартнома имзолашдан йироқда эмасмиз», — дея Лихачевнинг сўзларидан иқтибос келтиради ТАСС.
Май ойида Энергетика вазири Жўрабек Мирзамаҳмудов Ўзбекистон «Росатом» билан атом электр станцияси қуриш масаласини муҳокама қилишда давом этаётгани, шунингдек, бир вақтнинг ўзида кичик атом реакторлари соҳасидаги ютуқларни ўрганаётганини таъкидлаган эди. «Атом электр станциясини қуриш давлат учун жуда жиддий мажбуриятдир… Биз ҳар қандай хавфни бартараф этишимиз керак», — деди у.
Август ойида Ўзбекистонда АЭС қурилиши масаласида силжиш кузатилса, станция учун Венгриянинг қуруқ совитиш технологиясидан фойдаланилади, дея маълум қилганди Венгрия ташқи ишлар вазири Петер Сиярто. Унинг сўзларига кўра, бу лойиҳа юзлаб миллион евролик ҳамкорликни ўз ичига олади.
2022-йил ёзида Энергетика вазирлиги раҳбарининг собиқ ўринбосари Шерзод Ходжаев Ўзбекистон «Росатом» билан атом электр станциясини қуриш харажатларини камайтириш масаласини муҳокама қилаётгани ҳақида хабар берган эди. «АЭСда ишлаб чиқарилган энергия бизга қанчага тушади? Бошқа манбаларга нисбатан рақобатбардош бўладими? Иқтисодий жиҳатдан самарадор бўлмаса — маъно йўқ», — деганди у.
