АҚШ президенти Жо Байден 20 октябрь куни телевидение орқали халққа мурожаат қилди, нутқ ҲАМАСнинг Исроилга берган ракета зарбаси ва Россиянинг Украинага қарши урушига бағишланди. Мурожаат матни Оқ уй сайтида эълон қилинди.
Байденнинг сўзларига кўра, ҲАМАС ва Россия президенти Владимир Путин турли хил таҳдидларни келтириб чиқаради. Уларни «қўшни демократияни бутунлай йўқ қилиш» истаги бирлаштиради.
«ҲАМАСнинг мавжудлигидан мақсад Исроил давлатини йўқ қилиш ва яҳудий халқини ўлдиришдир. Айни пайтда Путин Украинада ҳақиқий давлатчилик бўлганини инкор этади. Унинг таъкидлашича, Совет Иттифоқи Украинани яратган. Ва икки ҳафта олдин у дунёга, агар Қўшма Штатлар ва иттифоқчиларимиз [Украинадан] кетса, Украина бир ҳафтагина яшашини айтди», — деди Байден.
Унинг таъкидлашича, можаролар америкаликлар учун узоқдек туюлиши мумкин, аммо Исроил ва Украина муваффақиятини таъминлаш Американинг миллий хавфсизлиги учун ҳаётий зарурат.
«Тарих бизга шуни ўргатдики, террорчилар ўз террори учун, диктаторлар ўз тажовузи учун [бадал] тўламаса, улар [янада] кўпроқ тартибсизлик, ўлим ва вайронагарчиликка сабаб бўлади. Улар [бу ишда] давом этмоқда, Америка ва дунё учун таҳдидлар ортиб бормоқда», — деди президент.
Байденнинг таъкидлашича, иттифоқчилар ва душманлар АҚШнинг жавобини кузатмоқда ва агар Америка Путинга Украинани мустақилликдан маҳрум қилишга рухсат берса, «дунё бўйлаб потенциал тажовузкорлар ҳам худди шундай қилишга уринишади». Шундай қилиб, Америка президентининг фикрича, можаролар бутун дунёга, масалан, Тинч океани минтақасида ва айниқса, Яқин Шарқда тарқалиши мумкин.
Шу сабабли Байден Украина, Исроил ва АҚШнинг бошқа иттифоқчиларига ёрдам бериш учун Конгрессга шошилинч сўров юборишни режалаштираётганини айтди.
NBC News аввалроқ президент жами 100 миллиард доллар талаб қилиши, 60 миллиард доллари Украинага, 10 миллиарди Исроилга, қолгани эса Тайванга ёрдам бериш ва АҚШнинг Мексика билан чегарасида хавфсизликни таъминлаш учун йўналтирилиши ҳақида хабар берган эди.
«Бу оқилона сармоя бўлиб, авлодлар учун хавфсизлик дивидендлари сифатида қайтарилади», — деди Байден.
«Биз ҲАМАС каби террорчилар ва Путин каби тиран [ҳукмдорлар]нинг ғалаба қозонишига йўл қўймаймиз. Мен бунга йўл қўймайман», — деди президент.
У, шунингдек, Исроилни Қўшма Штатлар 2001 йил 11-центабрдан кейин йўл қўйган хатоларни такрорлашдан огоҳлантирди.
«Мен Исроил ҳукуматини ғазабдан кўр бўлмаслик ҳақида огоҳлантирдим. Америкада эса кимлигимизни унутмайлик. Биз мусулмонларга, яҳудийларга ёки бошқа бировга нисбатан нафратнинг ҳар қандай шаклини, кўринишини рад этамиз», — деди Байден.
Байден ҲАМАС Фаластин халқини ифодаламаслигини таъкидлади.
«ҲАМАС фаластинлик тинч аҳолидан тирик қалқон сифатида фойдаланади ва улар туфайли бегуноҳ фаластинлик оилалар катта азоб чекмоқда. Исроил ва фаластинликлар тенг даражада хавфсизлик, қадр-қиммат ва тинчликда яшашга лойиқдир», — деди АҚШ президенти.
