Исроил Мудофаа армияси вакили Даниэль Хагари ҲАМАС 199 кишини асирда ушлаб турганини маълум қилди. Гаровга олинганларнинг яқинлари хабардор қилинган. Хагарининг таъкидлашича, ҳарбийлар гаровга олинганлар Ғазо секторининг қаерида ушлаб турилганини билиш учун «қаттиқ ҳаракат» қилмоқда ва уларни хавф остига қўядиган ҳужум уюштирмайди.
ҲАМАСнинг ўзи эса 200−250 киши гаровда ушлаб турилганини маълум қилди. Бу ҳақда гуруҳ вакили Абу Обейданинг сўзларига таяниб, Al-Jazeera ёзди. Обейданинг таъкидлашича, 200 киши тўғридан-тўғри ҲАМАС томонидан, 50 га яқин одам эса «бошқа гуруҳлар» томонидан гаровга олинган. Обейда, шунингдек, Исроилнинг Ғазо секторига уюштирган ҳужумлари оқибатида 22 нафар гаровга олинганлар ҳалок бўлганини таъкидлаган.
Жаҳон соғлиқни сақлаш ташкилоти Исроил анклавни бомбардимон қилишда давом этаётган бир вақтда, Ғазода фақат «24 соатга етадиган сув, электр энергияси ва ёқилғи қолгани» ҳақида огоҳлантирди.
Эрон Ташқи ишлар вазирлиги матбуот котиби агар Исроил бомбардимон қилишни тўхтатса, ҲАМАС Ғазо секторидаги гаровга олинганларни озод қилишга тайёр эканини айтди. Бу ҳақда Насер Канани Теҳрондаги матбуот анжуманида маълум қилди, деб ёзди The Times of Israel.
Унинг сўзларига кўра, ҲАМАС вакиллари гаровга олинганларни озод қилиш учун керакли чораларни кўришга тайёр эканини маълум қилган, бироқ «бундай чоралар тайёргарлик талаб қилади, улар эса ҳар кунги бомбардимон шароитида имконсиз бўлиб қолмоқда».
ҲАМАСнинг ўзи ҳам эронлик дипломатнинг сўзларини тасдиқлагани йўқ. Аввалроқ гуруҳ гаровдагиларни фаластинлик гаровга олинганларга алмашишга тайёрлигини маълум қилганди.
Исроил Бош хавфсизлик хизмати (ШАБАК) раҳбари Ронен Бар разведка хизмати ҲАМАСнинг мамлакатга ҳужумининг олдини олмагани учун шахсий жавобгарликни ўз зиммасига олди. Бу ҳақда у разведкачилар ва уларнинг оилаларига йўллаган мактубида ёзган.
«Кўрган бир қанча чораларимизга қарамай, афсуски, ҳужумнинг олдини олиш учун етарлича огоҳлантириш бера олмадик», — дея унинг сўзларидан иқтибос келтиради «Гаарец».
Бар, шунингдек, ҲАМАСнинг Исроилга ҳужуми оқибатида ўн нафар разведка ходими ҳалок бўлганини қўшимча қилди.
Маълумот ўрнида, ШАБАК (шунингдек, Шин-Бет номи билан ҳам танилган) Исроил разведка агентликларининг энг каттаси бўлган умумий хавфсизлик хизмати ҳисобланади.
Европа Иттифоқи Миср орқали Ғазо секторига гуманитар ҳаво йўлаги очиш ташаббуси билан чиқмоқда, деди Еврокомиссия раҳбари Урсула фон дер Ляйен. Унинг қўшимча қилишича, Фаластин аҳолиси «ҲАМАСнинг ваҳшийлиги учун товон тўламаслиги керак». Гуманитар ҳаво йўлаги айнан қандай ташкил этилиши бўйича маълумот берилмаган.
The Wall Street Journal АҚШ Исроилга ёрдам бериш учун 2000 аскар юборишга тайёрлиги ҳақида ёзди.
Нашр манбасига кўра, ҳарбийларга маслаҳат ва тиббий ёрдам кўрсатиш вазифаси юкланган. Америка аскарларининг мумкин бўлган жанговар ҳаракатларда иштирок этиши кутилмайди дея аниқлик киритган нашр суҳбатдоши. АҚШ қўшинларини қандай шароитда ва қаерга жойлаштириши номаълум, бироқ Пентагон қарори Жо Байден маъмурияти Ғазо секторида қуруқликдан операция ўтказган тақдирда Исроил армиясини қўллаб-қувватлашга тайёрланаётганидан далолат беради.
Аввалроқ АҚШ Мудофаа вазирлиги «Жеральд Форд» ва «Дуайт Эйзенхауэр» авиаташувчи кемалари бошчилигидаги Ўрта денгизнинг шарқий қисмига иккита зарба берувчи гуруҳни жўнатганди. Пентагон раҳбари Ллойд Остин таъкидлаганидек, бу «Исроилга қарши душманлик ҳаракатлари ва ҲАМАСнинг Исроилга ҳужумидан кейин урушни кенгайтиришга қаратилган ҳар қандай уринишларнинг олдини олиш мақсадида» амалга оширилган.
ҲАМАС илк марта гаровга олинганлардан бирининг видеосини эълон қилди. Унда Nature Party фестивалида қуролланган шахслар томонидан ўғирлаб кетилган 21 ёшли Миа Шем тасвирланган, дея хабар бермоқда Meduza.
Видео ҲАМАСнинг кеча кечаси Европа Иттифоқи мамлакатларида блокланган Telegram каналига жойланган. Видеода Миа Шем қўлидан ўқ еганини ва Ғазо секторидаги шифохонада операция қилинганини айтган.
«Менга ғамхўрлик қилишмоқда, дори беришмоқда, ҳаммаси жойида. Мени тезроқ уйимга, ота-онам, ака-ука ва опа-сингилларимнинг олдига олиб кетишларини илтимос қиламан. Мени тезроқ бу ердан олиб кетинг. Илтимос», — деган у.
Видео қачон ва қандай шароитда суратга олингани номаълум. Миа Шемнинг оиласи видеодаги шахс у эканини тасдиқлаган.
АҚШ ва Исроил Ғазога гуманитар ёрдам етказиш режасини тайёрлашга келишиб олди.
АҚШ Давлат котиби Энтони Блинкен ва Исроил бош вазири Биньямин Нетаньяху ўртасидаги тўққиз соат давом этгани айтилаётган музокаралар 17 октябрь куни эрталаб якунланди. Учрашув ҳаво ҳужуми ҳақида огоҳлантириш сиренаси туфайли тўхтатилган ва Блинкен ва Нетаньяху қисқа муддатга бункерга тушишга мажбур бўлган.
«Агар ҲАМАС тинч аҳолига гуманитар ёрдам етказилишига қандайдир тарзда тўсқинлик қилса, жумладан, уни қўлга олса, биз биринчи бўлиб бу ҳаракатни қоралаймиз ва бу қайта такрорланмаслиги устида ишлаймиз», — деган Блинкен.
АҚШ президенти Жо Байден 18 октябрь куни Исроилга келади. Бу ҳақда унинг Twitter`даги саҳифасида хабар берилди. Америка президентининг сўзларига кўра, у «ҲАМАСнинг шафқатсиз террор ҳужумидан» жабр кўрган мамлакат билан бирга эканини намойиш этмоқчи.
Сўнгги маълумотларга кўра, ҲАМАС ҳужумлари оқибатида ҳалок бўлган исроилликлар сони 1400 нафардан ошди, 2,5 минг одам яраланган.
Ғазо секторида Исроил зарбалари оқибатида камида 2750 нафар фаластинлик ҳалок бўлди, 9700 дан ортиқ одам жароҳатланган.
