Ўзбекистон президенти Шавкат Мирзиёев 11 октябрь куни «Яшил макон» миллий лойиҳасини амалга оширишга бағишланган йиғилишда дарахтларнинг аҳамияти, уларни номига экишга йўл қўйиш керак эмаслиги ҳақида гапирди.
«„Яшил макон“ номига эмас, ўзимизнинг ҳаётимиз, ўпкамиз тозалигига, жамиятимизга, саломатлигимизга, керак бўлса ғуруримизга керак. „Яшил макон“ миллатимизга, мамлакатимизга, эртанги кунимизга керак. Кимдир келиб Ўзбекистондаги экологиямизни тўғрилаб бермайди. Кимдир келиб маҳалламизга, Орол денгизини қуриган тубига дарахт экиб бермайди, ҳеч қачон. Темир интизом ва ўзимизнинг меҳнатимиз натижасида пировард мақсадга эришамиз», — деди у (Ўзбекистон 24 телеканалининг «Менимча» дастуридан иқтибос).
Ҳар бир хонадон бир йилда иккитагина, ташкилот эса ўнтагина кўчат эксин, деди президент.
«Мен ҳурмат қиладиган ва ишонадиган маҳалла раислари бу масалага жонкуяр бўлишлари керак. Ҳар бир хонадон йилига иккитагина дарахт эксин, ҳар бир ташкилот ўнтагина дарахт эксин. Ҳамма ўрнак бўлиши керак. Бу масалага жамиятда ҳеч ким бефарқ бўлмаслиги керак. Шундай муҳит яратишимиз керакки, дарахтга бўлган муносабат уйимиздан, оиламиздан, неварамиздан, фарзандимиздан, жамиятимиздан, маҳалламиздан бошласак, ўйлайманки, ютуқ, натижа биз кутгандек бўлади», — деди давлат раҳбари.
Президент ташаббуси билан 2021 йил ноябрь ойидан бошлаб ҳар йили 200 миллион туп дарахт экиш лойиҳаси амалга оширилмоқда. 25 октябрдан 1 декабргача давом этадиган жорий куз мавсумида 85 миллион туп кўчат экиш режалаштирилган. Шавкат Мирзиёев шанба куни Тошкент шаҳридаги маҳаллалардан бирига кўчат ўтқазди.
Президент ўтган йиллардаги хатоларни такрорлашга йўл қўйиб бўлмаслигини таъкидлади. «Газета.uz» давлат раҳбарининг ўзи қайта-қайта таъкидлаган суғориш бўлмаган жойларга кўчат экиш, дарахт навларини нотўғри танлаш, парвариш қилинмаслиги, шунингдек, миллионлаб дарахтларни «экилган» сифатида қўшиб ёзиш ҳақида ёзганди.
