Машҳур теннисчи Ирода Тўлаганова Тошкентнинг Яшнобод туманидаги Авиасозлар саройи қаршисида жойлашган теннис кортлари бузилишига қарши чиқди. Мурожаат Ўзбекистон теннис федерациясининг Facebook`даги расмий саҳифасида ҳам эълон қилинди.
Тўлаганова «республикамиздаги теннис кортларини бузиш учун қарор қабул қилувчи ва масъул мутасаддиларга» мурожаат қилди.
«Мамлакатимизда спорт миллат саломатлигини мустаҳкамлашда муҳим ўрин тутади. Мамлакатимизнинг ҳар бир вилоятида, шунингдек, Тошкент шаҳрида, ҳар бир туманда теннис стадионлари барпо этилди. Аммо, афсуски, айни дамда кўплаб теннис кортлари бузиб ташланмоқда», — деди у.
Унинг сўзларига кўра, Жиззах шаҳрида иккита, Термиз шаҳрида эса илгари халқаро турнирлар ўтказилган халқаро стандартларга жавоб берадиган битта стадион бузиб ташланган. Тошкентда сўнгги бир неча йил ичида 20 дан ортиқ теннис корти бузиб ташланган.
«Айни пайтда „Авиасозлар“ теннис стадиони (собиқ Лисунова стадиони) тақдири масаласи бор. Агар сиз миллат саломатлигини мустаҳкамлашга бефарқ бўлмасангиз, нафақат мавжуд теннис кортларини асраб-авайлашга, балки янги спорт мажмуаларини ҳам барпо этишга чақирамиз, чунки статистик маълумотларга кўра, мамлакатимизда теннис ҳар йили аҳоли ўртасида тобора оммалашиб бормоқда», — дейди спортчи.
Ҳудудда яшовчи фуқаролардан бирининг айтишича, уч йил олдин «теннис кортларини ёпиб, бузиб ташламаслик учун ҳимоя қилишга муваффақ бўлишган», аммо бугун бу ҳудуд сотилаётгани маълум бўлди.
«Бу туманимизда болалар теннис ўйнаши мумкин бўлган ягона корт. Акс ҳолда уларни йўқотиб қўйишимиз эҳтимоли катта… Бугунги кунда барча ходимларга ишдан бўшаш тўғрисида ариза ёзиш ва 18-санагача ҳудудни бўшатиш кераклиги айтилган. Гўёки бу ерда реконструкция бўлар экан, лекин аслини олганда бу ерда нима бўлишини ҳеч ким билмайди. Эҳтимол, „Қозоғистон“ кинотеатри билан бўлган ҳолат такрорланар, у ҳам дастлаб реконструкция қилиниши керак эди, лекин аслида у ерда кўп қаватли уй қуришган», — деди аёл.
Жорий йилнинг май ойида Авиасозлар саройи қаршисидаги теннис кортлари бўлган спорт мажмуаси Universal Tennis Plus бошқарув компанияси томонидан кимошди савдосига қўйилган эди. Spot нашрининг ёзишича, 16 май куни бўлиб ўтган аукцион 4 соат 48 дақиқа давом этган. Ғолиб бўлган талабнома Отабек Нурмуҳамедов томонидан тақдим этилган бўлиб, у объект учун 30,99 млрд сўм — бошланғич баҳодан 5 фоизга кўпроқ таклиф қилган.
Universal Tennis Plus МЧЖдаги давлат улуши илк бор 2022 йилда сотувга қўйилган. Активнинг бошланғич қиймати 29,52 млрд сўмга баҳоланган.
Устав капитали 5,4 млрд сўм бўлган компания бир нечта очиқ ва ёпиқ теннис кортларига эга «Авиасозлар» спорт мажмуасини бошқарган. Объект 0,76 гектар майдонда жойлашган.
Отабек Боходирович Нурмуҳамедов узум етиштириш билан шуғулланувчи Mirazizhoji корхонасининг 11 фоизи (устав капитали — 957,3 млн сўм), шунингдек, қурилиш металл конструкциялари ва буюмлари ишлаб чиқарувчи M-Trans Service`нинг 50 фоизи (6 млн сўм) улушига эга.
Ўзбекистондаги теннисга оид янгиликларни ёритиб борувчи Instagram`даги Tennisfam.uz саҳифасида ҳудуд яқингача NRG Uzbekistan компаниясига тегишли бўлгани хабар қилинган, бироқ компания «Газета.uz»га мазкур иншоотга алоқаси йўқлигини маълум қилди.
