Эрон «ахлоқ полицияси» 16 июль куни мамлакатда мажбурий ҳижоб ўраш қоидаларига риоя этилишини назорат қилиш учун пиёда ва автомобиль патрулларини тиклади, деб хабар берди Al Jazeera.
Полиция биринчи навбатда кийиниш қоидаларига риоя қилмаган аёлларга ҳижобни тўғри ўраш ёки қандай кийимларни кийиш бўйича огоҳлантиришлар беради. «Ушбу меъёрларни бузмоқчи бўлганлар» ҳибсга олиниши ва «қайта тарбия марказлари»га олиб кетилиши мумкин.
Ўтган йили мамлакат бўйлаб кенг кўламли намойишлардан сўнг «ахлоқ полицияси» Эрон кўчаларида патруллик қилишни тўхтатганди. Бунга 22 ёшли Маҳса Аминийнинг ўлими сабаб бўлган — у ҳижобни талаб этилганидек ўрамагани учун ҳибсга олинганидан кўп ўтмай вафот этган. Намойишчилар гендер тенглиги, кенг қамровли ислоҳотлар ва режим ўзгаришини талаб қилган. Аёллар норозилик сифатида ҳижобларини ёқиб, сочларини кесган.
Эрон ҳукумати норозилик намойишларини шафқатсизларча бостирган, БМТ маълумотларига кўра, уларда қатнашгани учун 20 мингга яқин одам ҳибсга олинган. Мамлакатда 2022 йилда қатл этилганлар сони 2021 йилга нисбатан 75 фоизга ошган — жами 582 киши қатл этилган.
Ҳижоб ўраш Эронда 1983 йилда Ислом инқилобидан тўрт йил ўтиб, мамлакатда монархия ағдариб, Ислом республикаси эълон қилинганидан кейин барча аёллар учун мажбурий бўлган. Эроннинг амалдаги Жиноят кодексига кўра, жамоат жойларида ҳижобсиз кўриниш берган аёллар 10 кундан 2 ойгача қамоқ жазосига ҳукм қилиниши ёки жаримага тортилиши мумкин.
