Эронда бир неча кун давом этган норозилик намойишлари тартибсизликларга айланди. Мазкур намойишлар ҳижобни нотўғри ўрагани учун полиция ўринбосари томонидан ҳибсга олинган 22 ёшли талаба Маҳса Амини ўлимидан сўнг бошланди.

Reuters агентлигининг Эрон ОАВлари ва маҳаллий прокурорга таяниб хабар беришича, сўнгги икки кун ичида 4 киши ҳалок бўлган, расмий манбаларга кўра жами қурбонлар сони 8 нафарга етган, улардан 2 нафари полициячи.

Эроннинг курдлар яшовчи шимоли-ғарбий минтақаларида бошланган ва кейин камида 50 та шаҳарга ёйилган мазкур норозилик намойишлари 2019 йилда бензин нархи ошишига қарши ўтказилган намойишлар тўлқинидан кейинги энг йирик воқеа бўлди, деб ёзади агентлик.

Курдларнинг Hengaw инсон ҳуқуқлари ташкилоти ҳисоботларига кўра, 10 нафар намойишчи ҳалок бўлган, 450 нафари яраланган ва 500 нафари ҳибсга олинган, аммо бу рақамлар ҳали тасдиқланмаган.

Фото: Wana News Agency.

Ижтимоий тармоқларда тарқалган видеоларда аёлларнинг норозилик сифатида ҳижобларини ёқиб, сочларини қирқаётганларини кўриш мумкин.

BBC`нинг IRNA агентлигига таяниб хабар беришича, полиция минг нафаргача етган оломонни тарқатиш учун кўздан ёш оқизувчи газ ишлатган. Жанубдаги Шероз шаҳридаги тўқнашувларда бир полициячи ҳалок бўлгани, тўрт нафари яралангани хабар қилинган.

Намойишчилар кўчаларни тўсиб қўйган, хавфсизлик кучларига тош отган, полиция машиналари ва чиқинди қутиларига ўт қўйган, ҳукуматга қарши шиорлар билан чиқишган.

Расмийлар хавфсизлик кучлари намойишчиларга қарата ўқ узгани ҳақидаги хабарни рад этиб, улар қуролланган диссидентлар томонидан отиб ташланган бўлиши мумкинлигини тахмин қилмоқда.

Фото: france24.com.

21 сентябрь куни мамлакатда қолган икки ижтимоий тармоқ — Instagram ва WhatsApp`га кириш чекланди. NetBlocks ташкилотининг маълум қилишича, Курдистон вилоятининг айрим ҳудудларида интернет бутунлай узилиб қолган. Пойтахт Теҳрон ва мамлакатнинг бошқа ҳудудларида ҳам узилишлар кузатилган.

Мамлакат расмийлари ўтган жума куни Амини ҳибсга олинганидан кейин вафот этгани ҳақида хабар бериб, ўлим юрак ҳуружи туфайли содир бўлганини айтди. Марҳуманинг яқинлари қизнинг юраги шу вақтгача ҳеч қачон муаммога дуч келмаганини таъкидламоқда.