Туркия президенти Режеп Таййип Эрдоған Швециянинг НАТОга аъзо бўлиш ташаббусини қўллаб-қувватлашга розилигини билдирди. Бу ҳақда альянс раҳбари Йенс Столтенберг Литвада бўлиб ўтиши кутилаётган НАТО саммити арафасида маълум қилди, дея хабар бермоқда BBC.
Столтенберг келишув ҳақида Туркия раҳбари Режеп Таййип Эрдоған, Швеция бош вазири Ульф Кристерссон ва Европа кенгаши раҳбари Шарль Мишель билан музокаралар якунлари бўйича маълумот берган.
Шунингдек, НАТО бош котиби ўзининг Twitter саҳифасида Эрдоған «Швециянинг НАТОга аъзо бўлишини ратификация қилиш протоколини имкон қадар тезроқ парламентга юборишга ва унинг ратификация қилинишини таъминлашга рози бўлганини» ёзди.
«Бу барча НАТО иттифоқчиларини янада кучлироқ ва хавфсизроқ қиладиган тарихий қадамдир», — деди альянс бош котиби.
Бундан ташқари, АҚШ президенти Жо Байден ҳам Туркиянинг бу қарорини олқишлашини маълум қилди.
CNN Türk телеканали берган хабарга кўра, Швециянинг НАТОга кириши ҳақидаги аризаси Туркия парламентининг кузги сессиясида маъқулланиши кутилмоқда. Мазкур сессия 1 октябрда бошланади.
Туркиянинг Anadolu давлат агентлиги мамлакат Швециянинг НАТОга аъзолиги ҳақидаги протоколларни парламент кўриб чиқиши учун юборишини ва «уларнинг маъқулланиши учун яқиндан ҳамкорлик қилишини» қайд этди.
Ўз навбатида, Швеция Туркиянинг Европа Иттифоқига қўшилиши ва виза режимини либераллаштириш жараёнини қўллаб-қувватлашга ваъда берган, Туркия террорчи деб ҳисоблаган ташкилотларни қўллаб-қувватламаслигини маълум қилган.
Маълумот ўрнида, Швеция 2022 йил ёзида Финляндия билан биргаликда НАТОга кириш учун ариза топширган. Бу мамлакатлар Россия қўшинларининг Украинага бостириб кириши фонида иттифоққа қўшилишга қарор қилган. Қоидага кўра, НАТОга аъзо бўлиш учун номзод давлатнинг аризаси альянснинг барча аъзолари томонидан маъқулланиши керак.
Финляндия 2023 йил апрель ойида НАТОга қўшилди. Бу мамлакатнинг ҳарбий блокка қўшилишига Туркия охирги бўлиб розилик берган.
Швециянинг иттифоққа киришига Туркия бир қанча шартлар қўйиб, қарши чиққан. Хусусан, Туркия бу мамлакатдан Анқара террорчиликда айблаётган шахсларни экстрадиция қилишни, Туркия террорчи ташкилот деб ҳисоблайдиган Курдистон ишчилар партияси «фаолият юритишига йўл қўймасликни» талаб қилган.
10 июль куни Reuters Эрдоған Швециянинг НАТОга аъзо бўлиш ҳақидаги аризасини кўриб чиқишни маъқуллаш учун унинг мамлакати Европа Иттифоқига қабул қилинишини сўраётганини хабар қилганди.
Эслатиб ўтамиз, аввалроқ НАТО давлатлари Украинанинг ҳарбий блокка аъзо бўлиш бўйича аризасини тезлаштирилган тартибда кўриб чиқишга келишган.
