АҚШ Россияга қарши санкциялар доирасида Алишер Усмоновни «қора рўйхат»га киритди, деб хабар бермоқда Spot Швейцариянинг Handelszeitung нашрига таяниб.
Алишер Усмонов билан бирга рўйхатга тадбиркор Геннадий Тимченко, Россия Давлат думаси депутати Сулаймон Керимов ва бошқа бир қатор йирик тадбиркорлар ҳам киритилган.
Маълумот ўрнида, Украинада уруш бошлангандан кейин Европа Иттифоқи, АҚШ ва йирик халқаро молия ташкилотлари Россияда фаолият олиб борувчи сиёсатчилар, тадбиркорлар ва бошқаларга қарши санкциялар жорий эта бошлаган.
2022 йил март ойида Европа Иттифоқи санкциялар рўйхатини кенгайтирди ва унга USM ҳолдинг асосчиси, келиб чиқиши асли ўзбекистонлик бўлган рус миллиардери Алишер Усмоновни ҳам киритди. Кейинчалик АҚШ томонидан Алишер Усмоновнинг мулки, жумладан, супер яхтаси ва самолётидан фойдаланишга тақиқ қўйилди. Италиянинг Сардиния оролида эса Усмоновнинг мол-мулклари мусодара қилинди.
Апрел ойига келиб Буюк Британиянинг янги санкциялар рўйхатига келиб чиқиши ўзбекистонлик бўлган уч аёл, жумладан, Алишер Усмоновнинг икки синглиси ҳам киритилди. Май ойида Алишер Усмонов ЕИ кенгашининг унга нисбатан санкциялар қўллаш ҳақидаги қарорини бекор қилишни талаб қилиб, Европа судига даъво аризаси билан мурожаат қилди. Июль ойида Алишер Усмоновнинг жиянлари Буюк Британия санкциялари рўйхатига киритилди.
Шунингдек, ноябрда Financial Times Ўзбекистон Европа Иттифоқидан Алишер Усмоновга нисбатан санкцияларни бекор қилишни сўраётгани ҳақида ёзганди. Нашрнинг ёзишича, Ўзбекистон томони бу илтимосни амалдаги чекловлар миллиардернинг мамлакат иқтисодиётига инвестициялар киритишига халал бераётгани билан изоҳлаган.
