Британия Европа Иттифоқи билан келишилган ҳолда 13 апрель куни Россияга қарши санкциялар рўйхатини кенгайтирди ва унга яна 206 нафар тадбиркор ва сиёсатчи ҳамда уларнинг оила аъзоларини қўшди, деб хабар беради Британия Ташқи ишлар вазирлиги сайти. Рўйхатдан келиб чиқиши ўзбекистонлик бўлган 3 киши ҳам ўрин олган.
Улардан биринчиси USM холдинг асосчиси Алишер Усмоновнинг Ўзбекистонда туғилган, Россия фуқаролигини олган опаси Гулбаҳор Исмоиловадир. Буюк Британия Ташқи ишлар вазирлиги баёнотида айтилишича, Усмонов ўз синглисига мол-мулкни ўтказгани, жумладан, уни Дилбар яхтасининг ягона эгаси қилиб қўйгани сабабли ЕИ унга қарши аллақачон санкциялар жорий этган. Активларини музлатишдан ташқари, Исмоиловага Буюк Британияга кириш ва мамлакатда қолиш тақиқланган. Ўзбекистонда Гулбаҳор Исмоилова Тошкентдаги Федорович номидаги клиник санаторий таъсисчилари қаторига киритилган (82,1 фоиз). Қолган улуш Кипрнинг Galenus Limited компаниясига тегишли.
Алишер Усмоновнинг яна бир синглиси Саодат Нарзиевага нисбатан ҳам санкция қўлланган. «Газета.uz» унинг исми Швейцариянинг Credit Suisse банки мижозлари рўйхатида пайдо бўлгани тўғрисидаги маълумотлар сизиб чиққани маълум бўлганини хабар қилган эди. Тадбиркорнинг матбуот хизмати йирик банк ҳисобварақлари ҳақидаги маълумотларни ҳақиқатга тўғри келмайдиган, деб атади. Саодат Нарзиева Тошкентда акушер-гинеколог бўлиб ишлайди. КТЯДР маълумотларига кўра, у Humon Quality хусусий клиникасига эга. Унинг Буюк Британиядаги активлари ҳам музлатиб қўйилади ва унга мазкур давлатга сафар қилиш тақиқланади. Аввалроқ Европа Иттифоқи ҳам унга қарши санкциялар жорий қилган эди.
Ўзбекистон фуқароси Нигина Заирова Россиянинг Алфа-банкининг асосий эгаси Михаил Фридманнинг ижрочи ёрдамчиси сифатида қайд этилган. Санкция ҳужжатида айтилишича, у тадбиркор санкциялар остида қолганидан кейин учта активнинг эгаси бўлган. Буюк Британияда у ушбу учта компанияда Фридман номидан иш олиб боради, деб ҳисоблашади. Нигина Заированинг Буюк Британиядаги активлари ҳам музлатиб қўйилади.
