18 июнь, якшанба куни Тошкент шаҳрининг Янгиҳаёт туманида юк ташувчи лифтнинг носозлик туфайли тезлашиб кетиши оқибатида 11 киши жабрлангани ҳақида хабар берилган эди.
Бош прокуратура матбуот котиби Ҳаёт Шамсиддиновнинг «Газета.uz»га маълум қилишича, ҳолат Янгиҳаёт тумани, «Янги Дархон» МФЙ, 17-сонли кўп қаватли уйда содир бўлган. Ушбу бинонинг қурилиши «LAND HOUSE» МЧЖ томонидан 2022 йилнинг март ойида бошланиб, 2023 йилнинг май ойида фойдаланишга топширилган. Мазкур бинода жами 3 та лифт бўлган. Шундан, 2 таси аҳоли учун, 1 таси юк ташиш учун мўлжалланган.
Таъкидланишича, ушбу кўп қаватли уй 2023 йил май ойида фойдаланишга топширилган бўлса-да, аммо аҳолига мўлжалланган 2 та лифт носоз ҳолдалиги боис фуқаролар юк ташувчи лифтдан фойдаланиб келишган.
18 июнь куни лифтга белгиланган вазндан кўп миқдорда, яъни 1 тоннадан ошиқ, 13 нафар фуқаро 16-қаватдан минган. Улар 1-қаватга тушаётганида лифтнинг тушиш тезлиги 10-қаватга келганда тезлашиб кетган. Натижада, техник сабабларга кўра, лифт бошқаруви йўқолган ва унинг ичида бўлган жами 13 нафар одамнинг ҳаёти хавф остида қолган. Уларнинг икки нафари ёш бола бўлган.
Фуқаролар Респбулика шошилинч тиббий ёрдам илмий марказининг травматология бўлимига олиб борилган ва тиббий ёрдам кўрсатилган. 6 нафарига оёқ синиш ташхиси қўйилиб, реабилитация бўлимига ётқизилган. 7 нафари эса аҳволи қониқарли бўлганлиги сабабли уйига рухсат берилган.
Қайд этилишича, ҳозирда ҳолат бўйича терговга қадар текширув ишлари олиб борилмокда.
