15 июнь куни Uzbekistan Airways Чехиянинг LET Aircraft Industries концерни билан LET L-410-E20 енгил турбовинтли самолётларини харид қилиш бўйича шартнома имзолади, дея хабар қилди авиакомпания матбуот хизмати.
Хабарда қайд этилишича, ушбу самолётлардан кичик гуруҳ йўловчиларини ташиш учун ички йўналишларда рейслар сонини кўпайтириш, шунингдек, республикада ички туризмни ривожлантириш мақсадида харид қилинмоқда.
Ўзбекистон авиаташувчиси ушбу турдаги тўрттагача самолёт сотиб олишни режалаштирмоқда.
Улар ўта қисқа учиш-қўниш йўлакларида қўлланилиши мумкин ва Ўзбекистон ичидаги йўналишлар тармоғини, жумладан, Зарафшон, Шаҳрисабз ва Андижон каби шаҳарларга кенгайтириши кутилмоқда.
LET L-410 самолёти узунлиги 510 метрдан бошланадиган қарийб барча турдаги учиш-қўниш йўлакларига қўнган ҳолда 19 нафаргача йўловчини ташиш учун мўлжалланган. Шу билан бирга, улар 1500 км гача бўлган парвозни таъминлай олади.
Эслатиб ўтамиз, апрель ойида Тошкентда Чехия бош вазири Петр Фиала ва Ўзбекистон бош вазири Абдулла Арипов ўртасидаги музокараларда чех компаниясининг Ўзбекистонга L-410 самолётларини сотишдан манфаатдорлиги муҳокама қилинган эди.
