11 май куни Ўзбекистон Экологик партияси Марказий кенгашининг навбатдан ташқари пленуми бўлиб ўтди, дея хабар бермоқда ЎзА.
Пленумда партиянинг бўлажак съездида Ўзбекистон президенти лавозимига номзод этиб партия Марказий кенгаши ижроия қўмитаси раиси Хамзаев Абдушукур Худойкуловични кўрсатиш бўйича қарор қабул қилинди.
Абдушукур Хамзаев 1973 йилда Сурхондарё вилояти Узун туманида туғилган. 1995 йил Самарқанд қишлоқ хўжалик институтини, 2013 йил Давлат бошқаруви академиясини тамомлаган, мутахассислиги агроном олим. Қишлоқ хўжалик фанлари доктори, профессор ҳисобланади.
Мазкур лавозимгача у 2022 йил июнь ойидан буён Экопартиянинг Марказий кенгаши ижроия қўмитаси раиси ўринбосари бўлиб ишлаб келган. Оилали, уч нафар фарзанди бор.
Эслатиб ўтамиз, Ўзбекистонда 9 июл куни муддатидан олдин президентлик сайлови ўтказилади. Сайлов кампанияси 10 майдан бошланди. МСК сайловга тайёргарлик кўриш ва уни ўтказиш бўйича Календарь режани тасдиқлади.
Партиялар ўз ваколатли вакилларини рўйхатга олиш учун 13 майгача мурожаат қилади. Сайловда иштирок этиш учун ҳужжатларни эса 15 майгача МСКга юбориши керак. 17 майдан 1 июнгача партиялар ўз номзодларини кўрсатишлари мумкин. Номзодни рўйхатга олиш ҳақидаги ҳужжатларни тақдим этиш — 2 июнь куни якунланади.
МСК томонидан президентликка номзодларни рўйхатга олиш 6 июнгача амалга оширилади.
