Ўзбекистонда 9 июль куни бўлиб ўтадиган президент сайлови кампанияси 10 майдан бошланди. Бу ҳақда Марказий сайлов комиссиясининг муддатидан илгари президенти сайловига тайёргарлик кўриш ва уни ўтказиш билан боғлиқ ташкилий масалаларга бағишланган мажлисида маълум қилинди.

Мажлисда сайлов кампаниясини эълон қилиш ва сайловга тайёргарлик кўриш ва уни ўтказиш бўйича Календарь режани тасдиқлаш масаласи кўриб чиқилди.

Календарь режада мантиқий изчиллик асосида қонунчиликка мувофиқ амалга оширилиши лозим бўлган тадбирлар ва уларни амалга ошириш муддатлари белгиланди. Хусусан, Календар режага мувофиқ сайлов жараёнининг 7 та йўналиши бўйича 51 та тадбирлар назарда тутилди.

«Календар режа сайлов кампаниясини қонун талабларига риоя қилган ҳолда очиқ ва ошкора, тўғри ҳамда самарали ташкил этиш, мавжуд куч ва имкониятларни оқилона тақсимлаш ва сафарбар этишни таъминлайди», — деди МСК раиси ўринбосари Баҳром Кучкаров.

15 майгача сиёсий партиялар сайловда иштирок этиш учун Марказий сайлов комиссиясига ҳужжатлар тақдим этиши керак. Сайловга 52 кун қолгандан (17 май) бошлаб 38 кун қолгунига (1 июнь) қадар бўлган давр президентликка номзод кўрсатиш учун ажратилмоқда. Сиёсий партиялар томонидан президентликка номзодни рўйхатга олиш ҳақидаги Марказий сайлов комиссиясига ҳужжатларни тақдим этилиш сайловга 36 кун қолганда (2 июнь) якунланади. Президентликка номзодларни рўйхатга олиш сайловга камида 32 кун қолгунга қадар (6 июнгача) амалга оширилади. Номзодлар вакилларини рўйхатга олиш 7 июндан бошланади.

Сайловга тайёргарлик кўриш ва уни ўтказиш бўйича тадбирларнинг тартиби, босқичлари ҳамда муддатлари ҳақидаги ахборот сайловчилар ва сайлов жараёнларининг бошқа иштирокчиларига белгиланган тартибда Марказий сайлов комиссиясининг расмий веб-сайтида ва бошқа оммавий ахборот воситаларида эълон қилиш йўли билан етказилиши маълум қилинди.