Yandex Go иловасида сервис буюртмалари вақтида автотранспорт воситалари тезлигини автоматик мониторинг қилиш технологияси ишга туширилди.
«Газета.uz»га матбуот хизматининг хабар беришича, бу компаниянинг ўз ишланмаси бўлиб, мониторинг сервис мавжуд бўлган барча етти шаҳарда ишлайди.
Бунда, ҳайдовчи буюртмани амалга ошириш пайтида технология унинг йўлини кузатиш ва ҳаракат тезлигини аниқлаш учун GPSдан фойдаланади. Мазкур тезлик маршрутларни қуриш учун ишлатиладиган навигатор бўйича ушбу йўл кесимида рухсат этилган максимал тезлик билан таққосланади.
Ҳайдовчи белгиланган тезликдан ошиб кетган тақдирда тизим ҳайдовчини унинг иловаси орқали бу ҳақда огоҳлантиради.
Технология сигнал билан юзага келиши мумкин бўлган шовқинлар, жумладан координаталардаги кутилмаган ўзгаришларни ҳисобга олади ва уларни инобатга олмаслиги мумкин. Бир нечта огоҳлантиришлардан сўнг, алгоритм ҳайдовчининг хизмат кўрсатиш буюртмаларига киришини вақтинча чеклайди.
«Биз Ўзбекистон шаҳарларида хавфсизликни таъминлашга катта эътибор қаратамиз. Янги технология ҳайдовчиларга белгиланган тезликни назорат қилиш ва йўл-транспорт ҳодисалари хавфини камайтиришга ёрдам беради. Бошқа мамлакатларда аввал тезликни ошириб юрган ҳайдовчиларнинг 70 фоиздан ортиғи тизимдаги иккинчи хабарномадан сўнг уни пасайтирганини кўрдик», — деди Yandex Go компаниясининг Марказий Осиё бозорини ривожлантириш бўйича ижрочи директори Тамирлан Шапиев.
Маълумот учун, «Яндекс.Такси» 2018 йил апрель ойида Тошкентда ишга туширилган ва у ҳозирда пойтахтдан ташқари Фарғона, Наманган Андижон, Қўқон, Марғилон, Бухоро ва Самарқандда ҳам хизмат кўрсатади.
