Тошкент шаҳрида трамвай ҳаракатини тиклаш лойиҳасининг техник-иқтисодий асосларини ишлаб чиқиш август ойида якунланиши режалаштирилмоқда. Бу ҳақда халқ депутатлари Тошкент шаҳар кенгашининг 15 июлдаги сессиясида шаҳар Транспорт бошқармаси бошлиғи Анвар Жўраев маълум қилди. Унинг сўзларига кўра, трамвай чоксиз рельслар эвазига «шовқинсиз» бўлади, техник-иқтисодий асосларни ишлаб чиқишга эса хорижлик мутахассислар жалб этилган.
«Президентга икки йўналишда таклифлар тайёрлаяпмиз. Биринчиси, ТТЗ массивидан Шимолий вокзалгача, лойиҳа икки босқичда амалга оширилади. Ииккинчи йўналиш Чилонзор буюм бозори (Ипподром)дан Шимолий вокзалгача», — деди у.
«Нега биз бу икки нуқтани танладик? Ушбу икки пункт орқали Тошкент вилоятидан шаҳарга катта йўловчилар оқими кириб келади. Бу транспорт оқими кириб келишининг олдини олиш учун биз бу ерда [метро йўналишлари] такрорланмайдиган трамвай йўналишларини белгилаяпмиз», — деди Анвар Жўраев.
Президент Шавкат Мирзиёев февраль ойида мамлакатда трамвай ҳаракатланадиган ягона шаҳар — Самарқандга ташриф буюрар экан, трамвайни Тошкентга қайтариш режасини маълум қилганди. Кейинчалик бу бўйича ҳеч қандай тафсилотлар ёки режалар эълон қилинмади. Президент трамвай йўналишлари «етти марта ўлчаб, бир марта кесиш» орқали белгиланишини таъкидлаганди.
Аввалроқ, Грузия бош вазири ва Тбилиси мерининг Тошкентга ташрифи чоғида Грузия томони Шота Руставели кўчаси бўйлаб трамвай ҳаракати тикланиши мумкинлиги ҳақида баёнот берган эди. Тошкент томони эса бу хабарга изоҳ бермади.
«Газета.uz» Тошкентда трамвай қатновини ёпиш ҳақидаги қарорнинг шошқалоқлик билан қабул қилингани ва нотўғрилигига бир неча бор эътибор қаратган. Расмийлар трамвайни самарасиз деб атаганди ва транспорт муаммоларини (йўл тирбандлиги) йўлларни кенгайтириш, янги чорраҳалар ва метро линияларини қуриш орқали ҳал қилишни режалаштирганди. Натижада, шаҳарда жамоат транспорти билан боғлиқ вазият фақат ёмонлашди.
Бугунги кунда дунёда трамвайнинг бошқа жамоат транспорти турларидан афзалликлари ҳеч бир мутахассисда шубҳа уйғотмаган. Бизнинг сайтимизда трамвай ҳақида жуда кўп материаллар мавжуд. Уларга ҳаволалар қуйида келтирилган.
