Президент Шавкат Мирзиёев Тошкент шаҳрига трамвай қайтарилишини маълум қилди. Бу ҳақда «Дарё» ўз мухбирига таяниб, хабар бермоқда.
10 февраль куни Самарқанд вилоятида давлат раҳбари ҳудуддаги амалга оширилиши режалаштирилган янги лойиҳалар тақдимоти билан танишди.
Нашрнинг маълум қилишича, Шавкат Мирзиёев Самарқандда тирбандликларни камайтириш ва бартараф этиш учун илмий-амалий марказ қуриш кераклигини таъкидлаган.
«Шаҳарда тезликни камайтириб, тирбандликларни бартараф этиш керак. Авариялар оқибатида кўпгина инсонлар ҳалок бўлмоқда», — деган президент.
Давлат раҳбари Самарқандда трамвай бор эканлигини алоҳида қайд этган.
«Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деди у.
Тележурналист Хайрулла Нуриддинов «Ўзбекистон-24» телеканалида эфирга узатилган «Менимча» кўрсатувида Тошкентга трамвайни қайтариш таклифини берган эди. У аҳолига сифатли хизмат кўрсатиш учун ушбу оммавий транспорт турини қайтариш кераклигини таъкидлаган эди.
Тошкент трамвайининг сўнгги иш кунларида «Газета.uz» бир неча маротаба ушбу қарорнинг хатолигига эътибор қаратган эди. Ҳокимият ўшанда трамвай самарасизлигини таъкидлаб, транспорт муаммоларини (йўллардаги юклама ва тирбандликларни) йўлларни кенгайтириш, янги метрополитен линиялари ва йўл ўтказгичларини қуриш билан ҳал қилишини айтган эди. Бироқ, ривожланган мамлакатларда ушбу муаммолар, аксинча, йўлларни торайтириш, автомобиллар учун максимал ҳаракатланиш тезлигини пасайтириш ва оммавий транспорт тармоғини ривожлантириш орқали ҳал қилинади.
