Шавкат Мирзиёев Янги ҳаёт тумани фаоллари билан учрашувда жамоат транспорти мавзуси ҳақида тўхталган ва бугун дастлабки трамвай йўллари лойиҳаси билан танишганини айтган. Бу ҳақда «Дарё» хабар бермоқда.
«Самарқандда ҳам айтдим, Тошкентда трамвайни тиклаймиз дедим. Дунё яшил иқтисодиёт, яшил энергетика томон кетяпти. Хавфсиз, экологик тоза транспорт экани учун ҳам трамвайни кайтараётганимиз адолатдан деб ўйлайман. Мен бугун дастлабки трамвай йўллари лойиҳасини кўрдим. Етти ўлчаб бир кесиб, маршрутларни аниқлаймиз», — деган Шавкат Мирзиёев.
Шунингдек, метронинг қурилаётган қисмини Мустақиллик байрамигача тугатиш режалаштирилаётганини қўшимча қилган.
«Метронинг қурилаётган қисмининг Мустақиллик байрамигача тугатмоқчимиз. Метронинг қурилишини 30 йил унутиб қўйган эдик. Аввал ер ости метроси бор эди, ер усти метросининг қурилишини эса янгилик десак бўлади», — деган президент.
Эслатиб ўтамиз, 10 февраль куни Самарқанд вилоятида ишчи сафари давомида президент Шавкат Мирзиёев Тошкент шаҳрига трамвай қайтарилишини маълум қилган эди.
Бироз аввал «Газета.uz» трамвайнинг қайтиши жаҳон тренди ва жамоат транспортини ривожлантиришнинг ягона оқилона йўли экани таъкидланган таниқли журналист ва жамоат арбобларининг фикрларини эълон қилган эди.
Тошкент ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари Бахтиёр Раҳмонов эса 16 февраль куни бўлиб ўтган матбуот анжуманида Навоий кўчасига трамвай қайтарилмаслигини билдирган эди.
