Тошкент метрополитенининг барча ер усти станцияларида поездлар тезлиги соат 12:00 дан 18:00 гача пасайтирилади. Бу ҳақда метрополитен матбуот хизмати хабар берди.
Қарор «ҳаво ҳароратининг кескин исиши сабабли поездлар ҳаракати хавфсизлигини таъминлаш мақсадида» қабул қилинди.
Қайд этилишича, электропоездлар ҳаракатининг оралиқ интерваллари ҳам ортади.
Эслатиб ўтамиз, аввалроқ «Ўзтемирйўлйўловчи» 25−29 июнь кунлари кузатиладиган аномал жазирама туфайли шаҳарлараро поездлар қатнови тезлиги ҳам чегаралангани ҳақида хабар берган эди. Компания шу сабали поездлар белгиланган манзилларга кечикиб бориш ҳолатлари кузатилишидан огоҳлантирди.
Апрель ойида Сергели метро линиясида юқори ҳарорат таъсирида рельслар узайгани, бу контакт релсининг кронштейни ушлаб туриш қурилмаларадан чиқиб кетишига ҳамда поездларнинг тўхтаб қолишига сабаб бўлган эди.
2021 йил июнь ойида жазирама туфайли Тошкент метрополитенининг ҳалқа линиясида ҳам поездлар тезлиги чекланган эди.
