17 июнь куни ижтимоий тармоқларда юзлаб футбол ишқибозлари Ўзбекистон ва Саудия Арабистони ёшлар терма жамоалари ўртасида Осиё кубоги U-23 финал учрашуви чиптасини сотиб олишга урингани акс этган видеоёзув тарқалди.
Одамларнинг тўпланиши тартибсизлик ва тиқилинчларга олиб келди.
Видеолардан бирида Миллий гвардия ходими одамлардан орқага чекинишни сўраганини кўриш мумкин. Бошқа бир роликда эса икки ходим мухлислардан бирини мажбуран олиб кетишади.
Яна бир нечта видеоёзувларда кўздан ёш оқизувчи газ ишлатилгани ҳақида хабар берилган. Видеодаги кўплаб одамлар оғиз ва бурунларини рўмолча ёки кийим билан ёпгани, шунингдек, йўталгани кўринган. Сўнгра бир гуруҳ Миллий гвардия ҳарбий хизматчилари оломонни тарқатиб юборишади.
«Ушбу видеотасвирда кўриниб турганидек, чипта сотиб олиш мобайнида фуқароларимизнинг бир-бирини ҳурмат қилмаганликлари сабабли тирбандлик содир бўлган. Ушбу ҳудудда хизмат олиб бораётган ходимлар жамоат тартибини сақланишини талаб қилган ва айрим фуқаролар тартибга чақирилган, лекин ҳеч қандай куч ишлатиш ёки махсус воситалардан фойдаланиш ҳолатлари бўлмаган. Фуқаролар билан тушунтириш ишлари олиб борилиб, тез орада улар тарқатилди», — дейилади хабарда.
Фуқаролар билан тушунтириш ишлари ўтказилди ва улар тезда тарқатиб юборилди, дейилади хабарда.
Чипталар билан боғлиқ вазият
17 июнь куни эрталаб Профессионал футбол лигаси бош директори Диёр Имомхўжаев Ўзбекистон U23 — Саудия U23 ўртасидаги финал ўйини учун чипталар шу куни тушдан кейин сотувга чиқишини маълум қилди.
Унинг сўзларига кўра, чипталар секторига қараб 100, 50 ва 25 минг сўмдан сотилиши режалаштирилган.
У чипталар ҳақидаги батафсил маълумот ЎФА расмий телеграм каналида берилишини қайд этди. Чипталарни iticket.uz сайти орқали ҳам харид қилиш мумкинлиги айтилди. Кундуз куни тармоқларда «Бунёдкор» стадиони кассаларида чипталар эълон қилингандан 4 баравар қимматроққа сотилаётгани ҳақидаги хабарлар тарқалишни бошлади. Фақат дарвозалар орқасида бўш жойлар қолгани, марказий трибунадаги чипталар 250, 300 ва 400 минг сўмдан сотилаётгани таъкидланди.
Кундузи iticket.uz сайтида чипталар сотуви тез орада бошланиши кўрсатилган.
Бироқ сайтда чипталар кечқурунга бориб пайдо бўлди. ЎФА матбуот котиби ва шарҳловчи Даврон Файзиев компания буни фойдаланувчилар ёпирилиши натижасида юзага келган техник носозлик билан изоҳлаганини қайд этди.
ПФЛ раҳбари Ўзбекистон катта мусобақаларда тажриба тўплаётганини маълум қилди. У навбатдаги шундай мусобақада финалгача бўлган барча учрашувлар учун чипталарни олдиндан онлайн сотувга чиқаришни таклиф қилди.
«Шунда, айтайлик, финални кўрмоқчи бўлган ҳақиқий мухлисда унга кириш имконияти кўпроқ бўлади. Фақатгина Ўзбекистон чиқсагина финалга бораман деган кишиларда нисбатан камроқ бўлади. Гуруҳ босқичи ўйинлари қайси стадионда ва кимлар иштирокида ўтиши олдиндан аниқ. Қолган босқичларда стадионлар ва вақтлар аниқ бўлади, аммо жуфтликлар кейинроқ келиб чиқади. Мухлислар Ўзбекистон термасининг имконияти ва ўйинларига қараб чорак финал, ярим финал, финал чиптасини ҳарид қилиши мумкин. Бу ҳозиргидек ҳолатга нисбатан яхшироқ ечим бўлиши мумкин. Факт шуки, бундай масштабдаги ўйинларда максимум 28 минг чипта сотувга чиқади. Талаб эса миллиондан юқори. Нарх ҳам шундан келиб чиқиб белгиланади. Биз катта мусобақалар мезбонлиги орқали панд еб, тажриба тўплаб, режалаштириб борамиз. Ҳозирги ҳолатда ЎФА вакилларига ҳам, футбол мухлисларига ҳам сабр тилаймиз», — деб ёзди у.
Финалда Ўзбекистон олимпия терма жамоаси ярим финал учрашувида Австралия ёшлар термасини 2:0 ҳисобига мағлуб этган Саудия Арабистони U-23 жамоаси билан учрашади. Осиё чемпиони титули учун кечадиган ўйин 19 июнь куни 18:00 да «Бунёдкор» стадионида бўлиб ўтади.
