Олий таълим муассасаларига ўқишга кириш учун берилган имтиёзлар хатловдан ўтказилиши мумкин. Бу коррупцияга мойил муносабатларни бартараф этиш бўйича чора-тадбирларни назарда тутувчи дастур лойиҳасида келтирилган. Тегишли президент қарори лойиҳаси жамоатчилик муҳокамаси учун Адлия вазирлиги томонидан эълон қилинди.
Қарор лойиҳасига кўра, ОТМга кириш учун берилган имтиёзлар қайта кўриб чиқилиб, ягона ҳужжатда қатъий рўйхати шакллантирилиши мумкин. Ҳужжат лойиҳасида ушбу имтиёзларни умумий квотага киритмаслик тўғрисидаги қоида белгиланиши ҳам назарда тутилган.
Бунда қуйидагилар назарда тутилмоқда:
- олий таълим муассасаларига ўқишга киришда имтиёзлар беришни тўлиқ рақамлаштириш ҳамда электрон платформа орқали амалга оширилишини йўлга қўйиш;
- ўқишга киришда имтиёзлар беришнинг шаффоф тартибини белгилаш.
Бундан ташқари, бир ОТМдан бошқасига ўқишни кўчириш (шу жумладан, чет элдан) жараёнини рақамлаштириш, шунингдек, иккинчи мутахассисликка ҳамда ҳамкор чет эл олий таълим муассасалари билан келишилган ҳолда қўшма ўқув дастурларига қабул қилиш ва талабалар ҳисобини юритишда шаффофликни таъминлаш кўзланмоқда.
Ҳужжат лойиҳасида ОТМлардаги талабалар ётоқхонаси билан таъминлаш ва талабаларни жойлаштиришнинг электрон тизимини жорий этиш ҳам назарда тутилган.
