23 февралдан S7 Airlines Екатеринбург — Фарғона йўналишида мунтазам парвозларни йўлга қўяди, деб хабар бермоқда «Коммерсантъ» Екатеринбургнинг Кольцово аэропортига таянган ҳолда.
Таъкидланишича, Россия авиакомпанияси рейсларни ҳафтада бир марта чоршанбадан пайшанбага ўтар кечаси амалга оширади. Парвоз вақти 3 соатни ташкил қилади.
Парвоз йўналишида 164 йўловчига мўлжалланган Airbus A320neoдан фойдаланилади.
Ҳозирда Фарғонадан Екатеринбургга фақатгина «Уральские авиалинии» парвозларни амалга ошириб келади.
Жумладан, Кольцово аэропортидан ҳозирда Тошкент, Самарқанд, Бухоро, Наманган, Навоий, Урганч ва Ферғонага учиш мумкин. 2021 йилда Кольцоводан Ўзбекистонга амалга оширилган рейсларда қарийб 90 минг кишига хизмат кўрсатилган. Бу аэропорт йўловчилар оқимининг 1,5%ини ташкил қилган.
Илгарироқ, 31 январдан Uzbekistan Airways Express ҳаво кемаларида «тўлиқ эконом-класс» тамойили асосида Намангандан Москва, Пермь, Самара, Омск, Оренбург, Иркутск, Краснодар ва Екатеринбургга тўғридан-тўғри мунтазам авиақатновларни йўлга қўйилиши ҳақида хабар берган эдик.
Бунга қадар Ўзбекистон Транспорт вазирлиги S7 Airlines авиакомпанияси томонидан Ўзбекистонга амалга ошириладиган мунтазам парвозлар рўйхатини эълон қилган эди.
