UzAuto Motors компаниясининг 100 фоиз акцияси «Тошкент» республика фонд биржасида IPO`га чиқарилади. Бу президентнинг 17 январдаги «Капитал бозорини қўллаб-қувватлашнинг самарали механизмларини жорий этишга доир қўшимча чора-тадбирлар тўғрисида»ги [ПҚ-90-сон] қарорида қайд этилган.
Маълумот учун, IPO (Initial Public Offering), бу — компания акцияларининг бирламчи бозорга чиқарилишидир. Яъни акциялар кенг оммага таклиф этилади.
Қарорга мувофиқ, яна бир қатор акциядорлик жамиятлари, шу жумладан, UzAuto Motors Powetrain, Ўзбекгеофизика, Ўзтемирйўлконтейнер, Дори-дармон, Ўзбекистон почтаси, Универсал Суғурта ва Alskom компаниялари акциялари сотувга қўйилади.
2021 йилнинг апрель ойида президент фармони билан 2021−2023 йилларда акциялари фонд биржасида оммавий савдо учун жойлаштириладиган компаниялар рўйхати тасдиқланди. Унга кўра, Uzbekistan Airways, «Ўзметкомбинат», «Ўзбекнефтегаз», «Ўзмиллийбанк» ва «Ўзтрансгаз» каби бошқа компаниялар 2021−2023 йилларда акциялари фонд биржасида оммавий савдо учун жойлаштириладиган компаниялар рўйхатига киритилди.
Эслатиб ўтамиз, 2020 йилнинг сентябрь ойида ҳам UzAuto Motors 10 фоиз қўшимча акцияларини IPO ўтказишга тайёргарлик кўраётгани ҳақида хабар берган эдик.
