2022 йил ёзи ўрталаридан UzAuto Motors базасида Tracker автомобилларини оммавий ишлаб чиқариш режалаштирилмоқда. Бу ҳақда компания матбуот хизмати «Газета.uz»га хабар қилди.
Яқин кунларда Асакадаги автозаводда машиналарнинг синов вариантлари ишлаб чиқарилди. «Ҳозирда конвейерни жойлаштириш ва автомобилларни синовдан ўтказиш ишлари олиб борилмоқда», — дея қайд этилди компаниядан.
Автомобиль модели Global Emerging Markets (GEM) ягона бюджет платформасида кичик узелли йиғиш услубида ишлаб чиқарилади. Маҳаллийлаштириш даражаси камида 50 фоиз бўлиши кутилмоқда. «Бироқ биз бу кўрсаткични оширамиз», — дейилади хабарда.
Ишлаб чиқариш ҳажмининг йилига энг камида 80 минг дона автомобиль даражасида бўлиши режалаштирилган. Маҳаллий ишлаб чиқарилган автомобиллар нархининг ҳозирда тайёр кўринишда импорт қилинаётган Tracker моделларидан қанчалик фарқ қилиши ҳали маълум эмас.
«Амалиётнинг кўрсатишича, автомобиль нархи ҳақида фақатгина таннархи белгиланганидан кейин айтиш мумкин. Сўнгги йилларда бу кўрсаткич логистика ва импорт микрочиплари билан боғлиқ вазиятга жуда ҳам боғлиқ бўлиб турибди», — дея маълум қилди компания.
«Газета.uz» аввалроқ компания UzAutо Motors базасида Chevrolet Onix ва Tracker автомобилларини ишлаб чиқаришни ташкил этишга 427,7 млн доллар йўналтиришни режалаштираётгани ҳақида хабар қилган эди. Лойиҳанинг 2022 йилда ишга тушиши, қуввати эса йилига 190 мингта автомобилга тенг бўлиши кутилмоқда.
Аввалроқ Tracker фақатгина Хитой ва Бразилияда сотилган, бироқ 12 декабрда Американинг General Motors ва Хитойнинг SAIC Motor компанияларининг қўшма корхонаси халқаро бозорда янги Chevrolet Tracker автомобилини сотишни бошлади. 209 та автомобилдан иборат биринчи партия Ўзбекистонга ўтган йилнинг декабрида олиб келинган эди.
