АҚШнинг General Motors ҳамда Хитойнинг SAIC қўшма корхонаси бўлган SAIC-GM 12 декабрдан янги Chevrolet Tracker’ни халқаро бозорга экспорт қилишни бошлади. 209 та машинадан иборат бўлган биринчи партия Хитойдан Ўзбекистонга йўл олди. Бу ҳақда GM Authority хабар бермоқда.
Маълумотларга кўра, Хитойда ишлаб чиқарилган ушбу модель илк бор мамлакатдан ташқарига чиқарилди. Chevrolet Tracker ички бозорда 2019 йилнинг июнь ойида тақдим этилган эди.
Янги кроссовер модели Ўзбекистондаги Chevrolet Trax (Tracker номи билан сотилаётган) ўрнини босади. Маҳаллий сотувлар январь ойининг биринчи ҳафталарига режалаштирилган.
SAIC-GM компанияси Tracker’нинг Ўзбекистонга экспорти бошлангани унинг бизнесини мустаҳкамлашда муҳим қадам бўлиб, Марказий Осиёда транспорт воситаларини экспорт қилиш бўйича янги стратегияси билан янада кенгайишини маълум қилди. Ривожланаётган Қозоғистон, Қирғизистон, Тожикистон, Туркманистон ва Ўзбекистондан иборат бўлган минтақа шу пайтгача асосан GM Korea автомобиллари билан таъминланган.
Aпрель ойида юқоридаги корхона Ўзбекистонга 216 та Chevrolet Equinox автомобилини юборган.
Аввалроқ «Газета.uz» GM Uzbekistan (ҳозирги UzAuto Motors) Сhevrolet Onix седанини ва янги авлод Tracker кроссоверини ишлаб чиқаришни бошлашни режалаштираётгани ҳақида хабар берган эди.
