ЖССТ дастлаб Жанубий Африка ва Ботсванада аниқланган ва кутилганидан кўра тезроқ тарқалаётган коронавируснинг янги штаммини муҳокама қилиш учун фавқулодда йиғилиш чақирди, дея хабар қилмоқда Financial Times.
26 ноябрь — жума куни бўлиб ўтиши режалаштирилган йиғилишда коронавируснинг B.1.1.529 Sars-Cov-2 деб номланувчи янги варианти муҳокама қилинади.
Нашрнинг хабар беришича, ҳозирда янги штамм 82 кишида қайд этилган:
- 77 киши — Жанубий Африкада;
- 4 киши — Ботсванада;
- 1 киши — Гонконгда.
Икки кун аввал ўнта шундай ҳолат қайд этилган эди.
Хабарда айтилишича, Жанубий Африка Эпидемияга қарши кураш ва инновациялар маркази директори Тулио де Оливейра нашрга янги штамм хусусидаги хавотирларини, масалани ҳафта бошида ЖССТ расмийлари билан муҳокама қилганини ва улар фавқулодда йиғилиш чақиришга қарор қилганликларини маълум қилган. Унинг сўзларига кўра, Жанубий Африканинг Гаутенг минтақасида, жумладан, Йоханнесбургда қайд этилган янги ҳолатларнинг қарийб 90 фоизи янги штамм туфайли юзага келган.
«Вакциналарни четлаб ўтиш хусусиятига эга бўлган ёки дельтадан тезроқ тарқаладиган ҳар қандай янги вариант дунё пандемиядан чиқиб кетаётган бир пайтда жиддий муаммо туғдириши мумкин», — дейилади хабарда.
Де Оливейранинг таъкидлашича, янги вариантда юқори даражадаги юқумлилик билан боғлиқ хусусиятлар мавжуд бўлиб, айни пайтда энг долзарб савол — бу унинг «вакциналарга айнан қандай таъсир қилиши»ни аниқлаш.
ЖССТ ўз йиғилишида янги вариант «ташвиш» уйғотиши керакми ёки «қизиқиш», деган масалани муҳокама қилади.
«Дастлабки таҳлиллар шуни кўрсатадики, бу вариантда кўплаб мутациялар мавжуд бўлиб, улар қўшимча ўрганишни талаб қилади», — дея маълум қилган ЖССТ.
The Guardian нашрининг ёзишича, мутахассислар коронавируснинг «мисли кўрилмаган даражада кўп сонли мутацияга эга бўлган янги варианти организм иммунитетини четлаб ўтиб, касалликнинг янги тўлқинларини келтириб чиқариши мумкин"лигидан огоҳлантирмоқда. Тадқиқотчилар бу борадаги жиддий хавотирларини «бир қатор мутациялар вирусга иммунитетни четлаб ўтишга ёрдам бериши мумкин"лиги билан изоҳлашмоқда.
«COVID-19`нинг B.1.1.529 варианти спайк-оқсилида 32 та мутацияга эга, бу вируснинг аксарият вакциналар иммун тизимини вирусга тайёрлаш учун ишлатадиган қисмидир. Спайк-оқсилидаги мутациялар вируснинг ҳужайраларни юқтириш ва тарқалиш қобилиятига халақит бериши мумкин, аммо иммунитет ҳужайраларининг патогенга ҳужум қилишини қийинлаштиради. Ушбу вариант дастлаб Ботсванада қайд этилди, у ерда бугунги кунга қадар (24 ноябрь ҳолатига) 3 та кетма-кет шундай ҳолат қайд этилган. Яна 6 нафари Жанубий Африкада ва 1 нафари Гонконгда — Жанубий Африкадан қайтган сайёҳда тасдиқланган» — дейилади The Guardian хабарида.
Хабарда қайд этилишича, Лондон Империал коллежи вирусологи, доктор Том Пикок спайк-оқсилида мутацияларнинг ниҳоятда кўплиги бу вариант жиддий ташвиш туғдириши мумкинлигидан далолат беришини таъкидлади.
Кембриж университетининг клиник микробиология профессори Рави Гуптанинг сўзларига кўра, унинг лабораториясида олиб борилган ишлар B.1.1.529 даги иккита мутация инфекцияни кучайтириб, антитаначаларни таниб олишни камайтиришини кўрсатганлиги айтилмоқда.
UCL Генетика Институти директори профессор Франсуа Баллоукснинг фикрича, янги вариант иммунитети заиф одамда сурункали инфекция пайтида, эҳтимол, ОИВ/ОИТС билан касалланган ва даволанмаган беморда пайдо бўлган бўлиши мумкин.
Шунингдек, олимлар янги вариантнини унинг кучайиб бораётгани ва кенгроқ тарқалаётганлигининг ҳар қандай белгилари учун кузатиб борадилар.
