Маъмурий жавобгарлик тўғрисидаги кодексга киритилган ўзгартиришлар билан профилактика инспекторлари ваколатлари кенгайтирилди. Президент 4 октябрь куни имзолаган ҳужжат «Народное слово» нашрида эълон қилинди.
Ҳужжатга кўра, эндиликда ички ишлар органлари таянч пунктлари профилактика инспекторлари қуйидаги маъмурий ҳуқуқбузарликларни кўриб чиқиш ҳуқуқига эга (кодексда бириктирилганларга қўшимча равишда):
- 47-модданинг биринчи қисми (болаларнитарбиялаш ва уларга таълим бериш борасидаги мажбуриятларни бажармаслик);
- 47−3-модда (Никоҳ ёши тўғрисидаги қонунчиликни бузиш);
- 114 -модда (Темир йўл транспортидан фойдаланиш қоидаларини бузиш);
- 128−6-модда (Транспорт воситалари ҳайдовчиларининг тўхташ ёки тўхтаб туриш қоидаларини бузиши);
- 147 -модданинг биринчи қисми (Йўлларга, темир йўлдан ўтиш жойларига, йўл ҳаракатини тартибга солувчи бошқа иншоотлар ёки техник воситаларга шикаст етказиш, шунингдек йўл ҳаракатига қасддан, шу жумладан йўл қопламасини ифлослантириш йўли билан халал бериш, худди шунингдек автомобиль йўлларини ўзбошимчалик билан қазиш, уларда сунъий нотекисликлар ва тўсиқлар яратиш, автомобиль йўлида ишларни амалга ошириш учун берилган рухсатнома талабларини бажармаслик, шунингдек йўлларни сақлаш қоидаларини бузиш);
- 148-модда (ажратилган минтақаларда ва ёғоч кўприклардан 100 метргача бўлган масофада олов ёқиш, ёғоч кўприклар ва тахта тўшамали кўприкларда чекиш);
- 188-модда (Вояга етмаган шахсни ғайриижтимоий хатти-ҳаракатларга жалб қилиш);
- 188−2-модда (Вояга етмаган шахснинг кўнгил очиш (дам олиш) жойларида тунги вақтда бўлишига йўл қўйиш).
Бундан ташқари, божхона қонунчилигидаги айрим маъмурий ҳуқуқбузарликларни Давлат божхона қўмитасининг автоматлаштирилган ахборот тизими орқали рўйхатдан ўтказиш йўли билан уларни кўриб чиқишнинг соддалаштирилган тартиблари жорий этилмоқда.
