Франция собиқ президенти Николя Саркози бир йиллик қамоқ жазосига ҳукм қилинди
Париж суди Франциянинг собиқ президенти Николя Саркозини 2012 йилги сайлов кампаниясини ноқонуний молиялаштиришда айбдор деб топди ва уни бир йилга озодликдан маҳрум қилди. Бу муддатни у қамоқдан ташқарида ўтайди, шунингдек, унга электрон билагузук тақилади. Прокуратура бир йил, шундан олти ойини қамоқда ўташини сўраган.
Жорий йилнинг март ойида Саркози уч йиллик қамоқ жазосига ҳукм қилинган эди, улардан иккитаси шартли бўлган. Ўшанда у коррупция ва савдога таъсир қилишда айбдор деб топилганди. Шундай қилиб, Николя Саркози қамоқ муддати эълон қилинган илк Франция президенти бўлди.
Бу сафар Саркози фақат молиялаштириш меъёрларини оширганликда айбланди. Франция қонунларига кўра, президентликка номзод молиялаштиришни 22,5 млн евродан юқори миқдорга кўтаришга ҳақли эмас. Саркозининг сайловолди кампаниясининг ҳақиқий қиймати белгиланган меъёрдан 18 млнга кўп бўлиб, тахминан 42,8 млн еврони ташкил қилган. — BFM TV.
Aфғонистон шарқида ИД жангарилари билан тўқнашувда камида 17 нафар толиб ҳалок бўлди
Aфғонистонда «Исломий давлат» (ИД) террорчилик гуруҳи жангарилари билан тўқнашувда камида 17 «Толибон» аъзоси ҳалок бўлди. Бу ҳақда ТАСС Kabul News’га таяниб хабар бермоқда.
Жанглар Покистон билан чегарадаги Зобул вилоятида бўлиб ўтди. Маълумотларга кўра, ИД жангарилари пистирмадан ҳужум уюштирган. Шунингдек, маълум қилинишича, ИДнинг уч нафар вакили ўлдирилди. Бошқа тафсилотлар келтирилмаган.
Шунингдек:
- Афғонистон бош вазири в.б. мулла Муҳаммад Ҳасан Охунд «Толибон»нинг барча тарафдорларига зудлик билан шахсий мулкларини ташлаб, ҳаракат базаларига қайтишни буюрди. Охунднинг буйруқларида «мудофаа, ички ишлар вазирликлари, шунингдек, разведка хизматларининг барча ходимлари шахсий уйларини ташлаб, ҳарбий марказларга ва улар рўйхатга олинган бўлинмалар базаларига кўчиб ўтишлари керак», деб айтилган. Бундан ташқари, Ҳасан Охунд «Толибон» тарафдорларига Кобул ва унинг атрофидаги хусусий корхоналарнинг уйлари ва биноларига «транспорт воситалари ёки бошқа техникани тинтув қилиш баҳонасида» киришни тақиқлади. У ўз фармони билан, шунингдек, «хусусий уйлар ва корхоналардан транспорт ва ҳар қандай техникани олиб чиқишни» тақиқлади.
- Толибон ўз ҳарбий хизматчиларини ўқитиш учун мамлакат жанубидаги Зобул вилоятида ҳарбий ўқув марказини очди. Дастлабки ўқув курсида 400 киши қатнашади.
Эквадор қамоқхонасида тўдалар тўқнашувида 100 дан ортиқ киши ҳалок бўлди
Эквадорнинг Гуаякиль шаҳридаги қамоқхонада тўдалар ўртасидаги тўқнашувлар натижасида 116 киши ҳалок бўлди, 80 дан ортиқ киши яраланди. Бу ҳақда мамлакат президенти Гильермо Лассо маълум қилди.
Президент Эквадор пенитенциар (жиноий-ижроий) тизимида фавқулодда ҳолат эълон қилиб, ҳукуматга бошқа ваколатлар қаторида полиция ва аскарларни қамоқхоналарга юборишга рухсат берди. Лассо матбуот анжуманида Гуаякилда бўлаётган воқеалар «қайғули воқеа» эканлигини ва ҳозирча расмийлар қамоқхона устидан назоратни қайта тиклаганига кафолат бера олмайди, деб айтди.
Таъкидланишича, ҳозирги «тўқнашув» «Лос Лобос» ва «Лос Чонерос» тўдалари асирлари ўртасида қамоқхонада ҳукмронлик қилиш ҳуқуқи учун кураш натижасида бошланганини айтилмоқда.
YouTube COVID-19 вакциналари ҳақида нотўғри маълумотга эга контентни ўчириб ташлайди
YouTube видео хизмати нотўғри маълумотларга қарши курашиш доирасида бутун дунё бўйлаб тасдиқланган коронавирус вакцинасига шубҳа туғдирадиган контентни ўчириб ташлайди. YouTube вице-президенти Метт Халприннинг сўзларига кўра, вакциналар хавфли ёки соғликка узоқ муддатли салбий таъсир кўрсатиши мумкинлиги ҳақидаги барча видеолар тақиқланмоқда.
Янги қоида нафақат COVID-19'га қарши дори-дармонлар, балки барча вакциналарга ҳам тегишли, деб таъкидланмоқда.
Ўтган йили YouTube коронавирусга қарши вакциналарни танқид қилган бир қанча видеоларни тақиқлаб қўйганди. 2020 йил октябрь ойидан буён компания «YouTube'нинг COVID-19 вакцинаси соҳасидаги қоидаларини бузгани» учун 130 мингдан ортиқ видеони ўчириб ташлаган. — Bloomberg.
Аввалроқ, YouTube сайлов натижаларига шубҳа туғдирадиган контентни жойлаштиришни тақиқлаган эди.
Барбадос парламенти Елизавета II’ни мамлакатнинг расмий раҳбари деб ҳисобламасликка чақирди
Барбадос ассамблея палатаси (парламентнинг қуйи палатаси) конституцияга киритилган ўзгартиришларни бир овоздан қўллаб-қувватлади. Унга кўра, эндиликда Буюк Британия қироличаси Елизавета II мамлакатнинг раҳбари эмас. Қайд этилишича, 30 ноябрдан бошлаб мамлакат расман парламент республикасига айланади.
Барбадос — Буюк Британия бошчилигидаги Ҳамдўстлик таркибидаги мустақил давлатдир. Давлат раҳбари — генерал-губернатор сифатида кўрсатилган Буюк Британия қироличаси. Мамлакат 1966 йилда мустақилликка эришган. — ТАСС (EFE)
Шунингдек:
- Францияда 30 сентябрдан бошлаб 12 ва ундан катта ёшдаги ўсмирлар ресторан, спорт клублари, кинотеатрлар ва бошқа жамоат жойларига киришда «санитария рухсатномаларини» кўрсатишлари шарт. Таъкидланиши, француз ўсмирларининг учдан икки қисми коронавирусга қарши тўлиқ эмланган.
- Малайзия ҳукумати барча федерал ходимларга 1 ноябргача COVID-19'га қарши вакцинациянинг тўлиқ курсини ўташни буюрди. Талабни бузганлар интизомий жазога тортилади.
