Вашингтон университетининг Сент-Луисдаги Тиббиёт мактаби (АҚШ) олимлари коронавируснинг маълум бўлган барча мутацияларини зарарсизлантира оладиган антитаначани аниқладилар. Тадқиқот натижалари ОТМ расмий порталида эълон қилинди, дея хабар берди РИА Новости.
Тадқиқотчилар 43 та намунани ўрганиб, Петри чашкасидаги SARS-CoV-2 дастлабки намунасини юқтиришнинг олдини олишга қанчалик қодир эканликларини таҳлил қилишди. Сўнгра энг кучли зарарсизлантирувчи 10 та заррачалар гуруҳи кемирувчиларда синовдан ўтказилиб, энг самаралилари танлаб олинди.
Маълум бўлишича, SARS2−38 антитаначаси коронавируснинг кенг тарқалган «альфа», «бета», «гамма», «дельта», «каппа», «йота» штамлари ва ноёб мутацияларига қарши кураша олади.
Олимларнинг сўзларига кўра, SARS2−38 вируснинг спайк оқсилининг ўзгаришсиз қолаётган қисмига кириб бора олади. Антитаначанинг ноёб хусусиятлари паст концентрацияда юқори даражада зарарсизлантира олиши ҳамда инфекциянинг барча қўзғатувчиларига таъсир кўрсатишидан иборат.
Мазкур антитаначани «вирус жуда қийинчилик билан қаршилик кўрсатадиган» аралаш терапияни амалга ошириш учун бошқа антитаначалар билан биргаликда қўллаш режалаштирилмоқда.
Антитаначаларнинг сақланиш муддатлари
SARS-CoV-2 коронавирусига қарши антитанача касалликдан сўнг етти ой давомида барча қолади ёки ҳаттоки ортиши мумкин. Nature Comunications журналида чоп этилган тадқиқот муаллифлари шундай хулосага келдилар.
Барселона глобал саломатлик институтида (ISGlobal) ўтказилган тадқиқотда COVID-19 касаллигини аломатларсиз ёки енгил шаклда ўтказган 578 киши иштирок этди. Касалликдан етти ой ўтганидан сўнг улардан қон намунаси олиниб, SARS-CoV-2нинг 6 та антигенига қарши IgA, IgM ва IgG антитаначалари даражаси ва турлари, шунингдек, одамларда шамоллашни келтириб чиқарадиган тўртта коронавирусга қарши антитаначалар мавжудлиги текширилди.
Муаллифлар иштирокчилар ёши ва жинсидан қатъи назар, антитаначалар сони барқарор қолишини исботлай олдилар. Синов жараёнида шамоллашни келтириб чиқарадиган бошқа коронавирусларга (HcoV) қарши антитаначалар COVID-19дан ҳам муносиб ҳимоя қила олиши исботланди. Шу билан бирга, SARS-CoV-2 билан оғирроқ касалланган инсонларда HcoV антитаначалари миқдори пастлиги, COVID-19 билан аломатларсиз касалланганларда эса юқори экани маълум бўлди.
