Футбол бўйича Ўзбекистон терма жамоасига Сречко Катанец бошчилик қилиши мумкин. Футбол ассоциацияси (ФА) словениялик 58 ёшли мутахассис билан музокаралар олиб бормоқда.
«Бир қанча хорижий ва маҳаллий мураббийлар номзоди синчиковлик билан ўрганиб чиқилди. Мураббийлар кенгаши ҳамда мутахассислар таҳлил ва тавсиясига кўра словениялик тажрибали мураббий Сречко Катанец номзоди маъқул деб топилди», — дейилади футбол ташкилоти хабарида.
ЎФA ҳозирга қадар словениялик мураббий билан оғзаки келишувга эришган ва келаётган ҳафта Сречко Катанец ўзаро музокараларнинг якуний босқичини ўтказиш учун Ўзбекистонга ташриф буюриши кутилмоқда.
Ўзбекистон термасининг аввалги бош мураббийи Вадим Абрамов билан тузилган шартнома миллий жамоа 2022 йилги жаҳон чемпионати саралаш босқичидан чиқиб кетганидан сўнг бекор қилинган эди.
Сречко Катанец фаолиятини Словениянинг «Любляна» клубида бошлаган. 1981 йилдан 1988 йилгача у Югославиянинг «Олимпия», «Динамо» ва «Партизан» клубларида ўйнаган. 1988 йилда у Ғарбий Германиянинг «Штутгарт» жамоасига кўчиб ўтди ва у ерда бир мавсумни ўтказди. Свабияликлар билан Катанец УЕФА кубоги финалчисига айланди. Мавсум тугагач, у Италиянинг «Сампдория» жамоасига жўнаб кетди. Бу клуб билан у деярли барча унвонларини қўлга киритди: Чемпионат, Кубок ва Суперкубок. У Кубок эгалари кубогини ҳам қўлга киритди. 1991/92 йилги мавсумда у Чемпионлар кубоги финалчиси бўлган, унинг жамоаси қўшимча вақтда «Барселона»га 0: 1 ҳисобида ютқазган эди.
Фаолиятини якунлагач, мураббий бўлиб ишлади. У «Горица» ва «Олимпиакос» клубларида фаолият кўрсатди. Шунингдек, у Македония (2006−2009), Бирлашган Араб Амирликлари (2009−2011) ва Словения (2013−2017), шунингдек Ироқ (2018−2021) терма жамоаларини бошқарган. У ўз тарихида биринчи марта словенларни Европа ва жаҳон чемпионатларига олиб чиқди. Аммо жаҳон чемпионатида словенлар барча учрашувларда мағлуб бўлишди ва Катанец лавозимидан четлатилди.
