7 август куни Халқ демократик партияси октябрь ойида бўлиб ўтадиган президентлик сайловларига ўз номзодини эълон қилди.
Партия марказий кенгашининг навбатдан ташқари пленумидан кейин бўлиб ўтган брифингда партия раиси Улуғбек Иноятов журналистлар саволига жавоб берди. Бу ҳақда «Газета.uz» мухбири хабар бермоқда.
У дастлаб партия номидан аёл номзоднинг танланишига тўхталиб ўтди.
«Биз партиямизнинг стартегиясини янги жиҳатдан ишлаб чиқдик. Жуда кўп экспертлар, ўзимизнинг фаоллар, фахрийлар билан муҳокамалар қилдик. Ҳозир айтишингиз мумкин, нима учун партия лидери президентлик сайловларида номзод сифатида иштирок этмайди, деб. Мен ўйлайман, пленумдаги 72 нафар аъзонинг ҳаммасида ҳаяжон бор эдики, „партия менинг номзодимни кўрсатармикин“, деб. Лекин партия бу — коллегиал орган. Биз бирлашдик, фикрлашдик ва ўзимизнинг стратегияни танладик», — дейди у.
ХДП раисининг таъкидлашича, партиянинг мақсади битта — ҳукуматни эгаллаш, яъни президентлик сайловларида ғолиб бўлиш.
«Ана шу нуқтайи назардан олиб қарайдиган бўлсак биз номзодни тўғри танладик, деб ўйлаймиз. Чунки халқимиз аёлларга кўпроқ овоз беради ва партиямизнинг сиёсий платформасини таҳлил қилиб кўрилса, унда кўпроқ ижтимоий масалаларга эътибор қаратилган. Ана шу нуқтайи назардан биз номзодимизни тўғри танладик, деб ўйлайман. Бу бизнинг сайловларда ғалаба қозонишимизда бир қадам бўлди, деб ҳисоблайман», — дея қўшимча қилади Улуғбек Иноятов.
У партия сайловлар орқали яна бир бор демократияни намоён этаётганини билдирди.
«Очиқлик, ошкоралик, бу — Янги Ўзбекистоннинг ютуғи бўлади деб ҳисоблаймиз. Ва биз ўйлаймизки, партиямиз номидан кўрсатилган номзод, албатта, юқори ўринларни эгаллайди. Биз бу сайловларда ғалаба қозонишга катта имкониятга эгамиз. Бу сайловлардаги фаол иштирокимиз кейинги парламент сайловлари учун катта бир замин бўлиб хизмат қилади, деб ўйлайман», — дейди Улуғбек Иноятов.
Аввалроқ, президент сайловларида ХДП номзоди сифатида қатнашиши кутилаётган Мақсуда Варисова сайловда ғалаба қозонса, аввало ишсизлик ва бандлик соҳасида ислоҳотлар қилишини таъкидлаган эди.
Эслатиб ўтамиз, «Миллий тикланиш» партияси раҳбари Алишер Қодиров ҳам президентлик сайловларида ғалаба қозонишни ният қилаётганини билдирган эди.
