Ўзбекистон президенти Шавкат Мирзиёев чоршанба кунги видеоселектор йиғилишида мамлакатдаги эпидемиологик вазиятнинг ёмонлашганига тўхталди ва яна аҳолини коронавирусга қарши эмланишга чақирди, дея хабар бермоқда «Газета.uz» мухбири.
Эслатиб ўтамиз, 27 июль куни Ўзбекистонда 843 нафар кишида коронавирус инфекцияси қайд этилди. Бу пандемия бошланишидан бери энг юқори кўрсаткич. Шунингдек, 556 нафар кишида пневмония аниқланиб, 8 нафар бемор вафот этди.
Давлат раҳбарининг таъкидлашича, Ўзбекистон ҳар бир фуқаросининг ҳаёти учун курашишни давом эттиради ва бу учун керакли чораларни кўради.
Шавкат Мирзиёев яна бир маротаба фуқаролар ўз ҳаётлари ва саломатликлари учун масъул эканликларини эслатиб ўтди. Президент аҳолини яна коронавирусга қарши эмланишга чақирди ва 29 июль куни Ўзбекистон 3 миллион доза Moderna вакцинасини олишини таъкидлади. Олдинроқ хабар берилганидек, ушбу вакциналар АҚШ ҳукумати томонидан COVAX дастури доирасида беғараз ёрдам сифатида юборилмоқда.
«Вакцина олганлар шифохонадан 4 кунда чиқяпти, эмланмаганларга эса жуда оғир бўляпти. Ҳа, вакцинадан кейин касалланиш мумкин, лекин касаллик енгил формада кечяпти», — дея қайд этди у.
Олдинроқ, Чилонзор туманидаги савдо маркази биносида ташкил этилган коронавирусга қарши курашиш шифохонаси шифокорлардан бири вакцина олган 33 нафар бемор 3 кунда даволаниб чиққанини маълум қилган эди.
Давлат раҳбарининг маълум қилишича, Россия раҳбарияти билан Ўзбекистонда «Спутник V» вакцинасини қўшма ишлаб чиқариш бўйича музокаралар олиб борилмоқда. Шунингдек, ўзбек-хитой вакцинасини ҳам Ўзбекистонда ишлаб чиқариш бўйича ишлар қилинмоқда.
Унинг сўзларига кўра, Ўзбекистон томонидан ишлаб чиқарилган вакцина ЖССТ кўриб чиқиши учун юборилган. Президент ушбу вакцинани ишлаб чиқаришга катта маблағлар ажратилаётганлигини таъкидлади.
«Мен бугун эрталаб олимларнинг тадқиқотини ўқидим: биз бу касаллик билан ҳали камида 10 йил курашишимизга тўғри келади. Шунинг учун „Спутник V“ ва ўзбек-хитой вакцинасини ишлаб чиқаришни муҳокама қиляпмиз. Шунингдек, ўзимизнинг вакцинамизни ЖССТга юбордик. Бу учун катта пуллар ажратиляпти», — деди Шавкат Мирзиёев.
Президент аҳолининг 14 тоифасини мажбурий эмлаш чораларига ҳам изоҳ берди. Унинг сўзларига кўра, бу мажбурий чора.
Эслатиб ўтамиз, мажбурий эмланиш хизматлар соҳасида (умумий овқатланиш объектлари, гўзаллик салонлари, меҳмонхона бизнеси, банклар) фаолият юритадиган, шунингдек, ҳарбийлар, шифокорлар, тиббиёт ходимлари, ўқитувчилар ва бошқалар учун эълон қилинган. 27 июль куни эса Қонунчилик палатаси депутатлари аҳолининг айрим тоифаларини профилактик эмлашни мажбурий қилишни қонунийлаштириш ҳамда иш берувчиларга эмланишдан бош тортган ходимларини ишдан четлатишга рухсат бериш бўйича қонунчилик киритиладиган ўзгартиришларни маъқуллашди.
