АҚШ COVAX дастури доирасида 3 млн доза Moderna компаниясининг коронавирусга қарши вакцинасини беғараз ёрдам сифатида ажратди. Вакциналар 29 июль куни мамлакатга олиб келиниши кутилмоқда. Бу ҳақда Дунё АА хабар берди.

АҚШ Касалликларни назорат қилиш ва олдини олиш марказининг (CDC) маълумотларига кўра, Moderna вакцинаси COVID-19 инфекциясини 94% дан юқори самарадорлиги билан олдини олади. АҚШнинг озиқ-овқат ва дори-дармон маҳсулотлари сифатини назорат қилувчи бошқармаси (FDA) 18 ёшдан катталарга COVID-19 нинг олдини олиш учун Moderna вакцинасини маъқуллаган. Эмлаш курси бир ой оралиғида қўлланиладиган 2 дозадан иборат.

Pfizer ва BionTECH фармацевтика компанияларининг вакциналаридан фарқли ўлароқ, Moderna оддий совутгичда сақланиши мумкин, бу эса уларни кейинчалик Ўзбекистоннинг барча ҳудудларида тарқатилишини осонлаштиради.

Эслатиб ўтамиз, президент Шавкат Мирзиёев 23 июль ўтказилган видеоселектор йиғилишида 4 август куни Америкадан яна 3 млн доза вакцина олиб келинаётганини маълум қилган эди.