Яқинда ўз карьеасини якунлаган 46 ёшли Оксана Чусовитина Sport TV телеканалига берган интервьюсида Токиодаги ёзги Олимпия ўйинларидаги чиқишидан кейинги ҳис-туйғулари билан ўртоқлашиб, келгусидаги режалари тўғрисида сўзлаб берди.
«Афсуски, финалга чиқа олмадим, лекин ўйлайманки, бунинг ҳеч қандай қўрқинчли томони йўқ. Чунки, ўйлайманки, мен гимнастикада, спортнинг ушбу турида, қўлимдан келган барчасини қилдим. Бугун шундай тугаганидан хурсандман — оёқда қолдим ва йиқилмадим», — деди спортчи.
Бошловчи ёки ёш спортчиларга мурожаат қилар экан, Оксана Чусовитина уларни нима бўлишидан қатъи назар ҳар доим олға интилиш ва ҳеч қачон таслим бўлмасликка чақирди. Унинг сўзларига кўра, «ҳар қандай мағлубият доим ғалабага элтади».
«Шунча инсонларнинг мени қўллаб-қувватлаб турганидан бахтиёрман. Умид қиламанки, улар менинг финалга туша олмаганим ёки қаергачадир бора олмаганимдан хафа бўлишмади. Ўйлайманки, уларнинг барчаси гимнастикачи бўлганим ва Ўзбекистон учун чиқаётганим учун мухлислик қилмоқдалар. Барчага, бутун Ўзбекистонга, Олимпия қўмитамизга, Туризм ва спорт вазирлигига, федерациямизга шунча йил мени қўллаб-қувватлаганлари учун каттадан-катта раҳматлар айтишни хоҳлардим. Улардан жуда ҳам миннатдорман, аммо барчаси шу. Сизга катта раҳмат, қатъий ҳукм қилманг!» — деди ёзги Олимпиадалар рекордчиси.
Сўзининг охирида Оксана Чусовитина Ўзбекистонда ўз клубини очиш ҳамда болалар спортини ривожлантиришга ҳисса қўшиш орзуси борлигини қўшимча қилиб ўтди.
25 июль куни гимнастикачи таяниб сакраш бўйича саралаш босқичида 14,166 очко тўплаб, 16 иштирокчи орасида 11-ўринни эгаллади ва Токиодаги ёзги Олимпия ўйинларини тарк этди. Ўз чиқишидан сўнг Чусовитина профессионал фаолиятини якунлаганини эълон қилди.
Эндиликда собиқ гимнастикачи боксчи Бобоусмон Батуров билан биргаликда Олимпиада очилишида Ўзбекистон байроқдорлари бўлиши керак эди, аммо маросимдан бир неча соат олдин уларнинг ўрнини боксчи Баҳодир Жалолов ва таэквондочи Нигора Турсунқулова эгаллашди.
Оксана Чусовитина — 1992 йил Барселонадаги Олимпия ўйинлари чемпиони, уч карра жаҳон чемпиони, Осиё ўйинлари ғолиби. У ёзги Олимпия ўйинларида кетма-кет саккиз марта (1992, 1996, 2000, 2004, 2008, 2012, 2016, 2020) қатнашган дунёдаги ягона гимнастикачи сифатида Гиннеснинг Рекордлар китобига кирди. Ўзбекистонда хизмат кўрсатган спортчи, «Ўзбекистон ифтихори» фахрий унвони, «Дўстлик», «Меҳнат Шухрати» ва «Эл-юрт ҳурмати» орденлари соҳибаси.
