Токио-2020 Олимпия ўйинларининг очилиш маросимида Ўзбекистон делегацияси байроқдорлари маълум қилинди, дея хабар бермоқда Миллий олимпия қўмитаси ахборот хизмати.
Маросимда гимнастикачи Оксана Чусовитина ва боксчи Бобо-Усмон Батуров Ўзбекистон делегациясининг байроқдорлари бўлишади. Шу тариқ, Оксана Чусовитина ёзги Олимпия ўйинларида байроқдор бўлган ўзбекистонлик дастлабки аёл атлет сифатида тарихдан жой олмоқда.
Очилиш маросимининг сценарийсига кўра, барча давлатлардан 1 нафардан эркак ва аёл спортчилар байроқдор бўлиб чиқишади. Бу Халқаро Олимпия қўмитаси томонидан тарғиб қилинаётган гендер тенглик сиёсатининг амалда татбиқ этилишидир.
Оксана Чусовитина еттита ёзги Олимпия ўйинларида иштирок этган ер юзидаги ягона аёл гимнастикачи сифатида Гиннеснинг рекордлари китобига киритилган. Аввалроқ, у олимпиададан кейин фаолиятини якунлашини маълум қилган эди.
Маълумот учун, ХХХII ёзги Олимпия ўйинларининг тантанали очилиш маросими 23 июль куни Тошкент вақти билан соат 16:00 да Токиодаги «Олимпия» стадионида бошланади.
